Падзеі

Рыжанкоў: першы год членства Беларусі ў ШАС пацвердзіў правільнасць стратэгічнага курсу краіны

Фота МЗС

15 ліпеня, Мінск /Кар. БЕЛТА/. Міністр замежных спраў Беларусі Максім Рыжанкоў 15 ліпеня ў кітайскім горадзе Цяньцзінь упершыню ў гісторыі поўнафарматнага членства Беларусі ў Шанхайскай арганізацыі супрацоўніцтва прыняў удзел у пасяджэнні Савета міністраў замежных спраў дзяржаў - членаў гэтай арганізацыі. Аб гэтым БЕЛТА паведамілі ў прэс-службе МЗС Беларусі.

У сваім выступленні ў ходзе пасяджэння кіраўнік беларускага знешнепалітычнага ведамства падзякаваў кітайскаму боку за паспяховае старшынства ў ШАС і аказаны гасцінны прыём, адзначыўшы насычанасць года новымі прыкладнымі ініцыятывамі, у большасці з якіх Беларусь прымала актыўны ўдзел.

Максім Рыжанкоў падкрэсліў, што першы год членства Беларусі ў ШАС пацвердзіў правільнасць стратэгічнага курсу краіны на ўступленне ў арганізацыю. Ён заявіў аб намеры Беларусі ўносіць важкі ўклад у дзейнасць ШАС, выкарыстоўваючы свой транзітны, прамысловы і навуковы патэнцыял.

Міністр таксама агучыў гатоўнасць Беларусі стаць пастаяннай пляцоўкай для профільных мерапрыемстваў арганізацыі, садзейнічаць у яе рамках спрашчэнню гандлю, развіццю лічбавай эканомікі, фарміраванню фінансавай інфраструктуры, умацаванню ўзаемадзеяння ў сферы зялёнай прамысловасці і развіццю штучнага інтэлекту.

Кіраўнік беларускай дэлегацыі акцэнтаваў увагу на прыхільнасці Мінска да "шанхайскага духу", заснаванага на ўзаемнай павазе, роўнасці і салідарнасці. Ён таксама перасцярог, што ўступленне ў ШАС дзяржаў, якія грэбуюць яе прынцыпамі або пераносяць на яе пляцоўку двухбаковыя праблемы, з'яўляецца немэтазгодным і шкодным.

Іншым важным напрамкам работы ШАС магло б стаць яе ўзаемадзеянне з іншымі рэгіянальнымі міжнароднымі структурамі, уключаючы трэк ЕАЭС - ШАС. У гэтым кантэксце Максім Рыжанкоў нагадаў аб ініцыятыве Прэзідэнта Беларусі Аляксандра Лукашэнкі аб стварэнні на еўразійскай прасторы глабальнага транзітнага хаба.

Акрамя таго, прымаючы пад увагу першапачатковую місію ШАС - забеспячэнне рэгіянальнай бяспекі - кіраўнік беларускай дыпламатыі прапанаваў актыўней задзейнічаць арганізацыю ў якасці асноўнай пляцоўкі для абмеркавання палажэнняў Еўразійскай хартыі разнастайнасці і шматпалярнасці ў XXI стагоддзі.

Па выніках Максім Рыжанкоў падпісаў пратакол пасяджэння Савета міністраў замежных спраў дзяржаў - членаў ШАС, а таксама шэраг рашэнняў, неабходных для падрыхтоўкі маючага адбыцца саміту ШАС.

Акрамя таго, на палях мерапрыемства адбыўся шэраг двухбаковых сустрэч міністра. Максім Рыжанкоў сустрэўся з намеснікам прэм'ер-міністра - міністрам замежных спраў Пакістана Мухамадам Ісхакам Дарам. Адбыўся абмен думкамі аб стане і перспектывах двухбаковага ўзаемадзеяння паміж Беларуссю і Пакістанам, аб развіцці супрацоўніцтва ў рамках міжнародных арганізацый, а таксама аб фарміраванні графіка візітаў на вышэйшым і высокім узроўнях.

Адбыліся таксама рабочыя кантакты кіраўніка беларускага МЗС з міністрамі замежных спраў Кітая, Індыі, Расіі, Узбекістана, Таджыкістана, а таксама з генеральным сакратаром ШАС.

версія для друку

зрабіць стартавай

дабавіць у выбранае