Падзеі

Пасол: Беларусь і Сербія шукаюць магчымасці для развіцця супрацоўніцтва ў складаных знешніх умовах

Фота з архiва

5 жніўня, Мінск /Кар. БЕЛТА/. Беларусь і Сербія шукаюць магчымасці для развіцця супрацоўніцтва ў складаных знешніх умовах. Аб гэтым заявіў пасол Беларусі ў Сербіі Сяргей Маліноўскі ў інтэрв'ю тэлеканалу "Першы інфармацыйны", паведамляе БЕЛТА.

"Геапалітычная сітуацыя не можа не ўплываць. Паміж Беларуссю і Сербіяй знаходзяцца краіны, якія або ўвялі санкцыі супраць нашай краіны, або далучыліся да іх. Хоць Сербія не ўводзіла нейкіх перашкод для беларускага экспарту і мы маглі б вельмі актыўна развіваць наша эканамічнае супрацоўніцтва, тым не менш, на вялікі жаль, гэта сітуацыя ўсё ж такі негатыўна ўплывае. І мы цяпер разам з сербскімі партнёрамі шукаем магчымасці, як нам падтрымліваць і развіваць супрацоўніцтва ў гэтых умовах", - сказаў Сяргей Маліноўскі.

Беларусь разам з сербскім бокам аднавіла работу міжурадавай камісіі па гандлёва-эканамічным супрацоўніцтве. "Быў назначаны сустаршыня камісіі з сербскага боку. Мы падрыхтавалі яго візіт у Беларусь, дзе ён азнаёміўся з нашымі новымі высокатэхналагічнымі прадуктамі. Для сербскага боку ўяўляе вельмі вялікую цікавасць, напрыклад, наш электратранспарт. Усе гэтыя напрамкі супрацоўніцтва мы заклалі ў сумесныя дакументы і правялі пасяджэнне міжурадавай камісіі. І цяпер у нас ёсць падпісаная абодвума бакамі дарожная карта супрацоўніцтва на бліжэйшыя тры гады. І ў гэтай карце ёсць некалькі канкрэтных мерапрыемстваў. Мы хочам і далей развіваць і аднаўляць дзейнасць нашых інстытуцыянальных інструментаў. Плануем развіваць супрацоўніцтва ў галіне сельскай гаспадаркі. Мы маем намер правесці да канца года пасяджэнне адпаведнай рабочай групы", - адзначыў пасол.

У планах таксама актывізаваць супрацоўніцтва ў галіне транспарту, турызму, высокіх тэхналогій. "Функцыянуе паспяхова наша рабочая група ў сферы навукова-тэхнічнага супрацоўніцтва. У нас ёсць планы па правядзенні сумеснага конкурсу навукова-тэхнічных праектаў. І, вядома ж, актуальна супрацоўніцтва ў сферы прамысловасці. Гэта традыцыйная моцная пазіцыя нашага экспарту ў Сербію. І нават калі сёння ёсць нейкія цяжкасці, мы абавязкова будзем працаваць на перспектыву, на будучыню", - сказаў на заканчэнне Сяргей Маліноўскі.

версія для друку

зрабіць стартавай

дабавіць у выбранае