Падзеі

Пасол Беларусі і губернатар Гаваны пацвердзілі гатоўнасць пашыраць эканамічныя кантакты дзвюх краін

Фота з архiва

28 сакавіка, Мінск /Кар. БЕЛТА/. Надзвычайны і Паўнамоцны Пасол Рэспублікі Беларусь у Рэспубліцы Куба Віталь Барчук сустрэўся з губернатарам Гаваны Янет Эрнандэс Перэс. Аб гэтым карэспандэнту БЕЛТА паведамілі ў пасольстве нашай краіны ў Кубе.

Бакі абмеркавалі бягучы стан і перспектывы развіцця беларуска-кубінскіх адносін у галінах камунальнай і сельскай гаспадаркі, харчавання, будаўніцтва, фармацэўтыкі, лёгкай прамысловасці і машынабудавання. Была выказана зацікаўленасць у пашырэнні двухбаковага супрацоўніцтва па рэалізацыі комплексных рашэнняў, накіраваных на добраўпарадкаванне горада і яго наваколля.

Акрамя таго, бакі пацвердзілі ўзаемную гатоўнасць да вызначэння новых эфектыўных механізмаў узаемадзеяння. Асаблівую ўвагу кіраўнік беларускай загранустановы ўдзяліў магчымасцям пашырэння механізма ўзаемных паставак, неабходнасці работы па спрашчэнні сертыфікацыі і рэгістрацыі харчовых тавараў у мэтах нарошчвання тавараабароту, а таксама перспектывах стварэння на Кубе сумесных вытворчасцей з выкарыстаннем беларускіх тэхналогій і сыравіны.

Па выніках перагавораў губернатар Гаваны Янет Эрнандэс Перэс падпісала арыгіналы Праграмы супрацоўніцтва паміж Мінгарвыканкамам і ўрадам Гаваны, рэалізацыя якой будзе садзейнічаць умацаванню ўсебаковага партнёрства паміж дзвюма краінамі. Яна таксама выказала гатоўнасць разгледзець магчымасць падпісання ў бліжэйшы час мемарандума аб супрацоўніцтве паміж Віцебскай вобласцю і горадам Гавана.

версія для друку

зрабіць стартавай

дабавіць у выбранае