Падзеі

Партыя "Белая Русь" і Кампартыя Кубы падпісалі дарожную карту міжпартыйнага супрацоўніцтва

Фота з архiва

19 кастрычніка, Мінск /Кар. БЕЛТА/. Беларуская партыя "Белая Русь" і Кампартыя Кубы (КПК) падпісалі дарожную карту аб напрамках міжпартыйнага супрацоўніцтва. Цырымонія падпісання адбылася ў будынку Цэнтральнага камітэта Кампартыі Кубы ў Гаване ў час візіту дэлегацыі Беларускай партыі "Белая Русь" у Рэспубліку Куба, паведамляе БЕЛТА.

Подпісы пад дакументам паставілі старшыня Беларускай партыі "Белая Русь" Вольга Чамаданава і член Палітбюро, сакратар ЦК КПК па арганізацыйных пытаннях доктар Раберта Маралес Ахеда.

У дарожнай карце выкладзена канкрэтная праграма дзеянняў у галіне палітыкі, эканомікі, маладзёжнай сферы і міжнародных адносін. Дакумент накіраваны на практычную рэалізацыю пагаднення аб узаемаабмене і супрацоўніцтве, якое было падпісана 26 чэрвеня 2025 года ў Мінску ў час міжпартыйнай сустрэчы, прымеркаванай да афіцыйнага візіту Прэзідэнта Кубы Мігеля Дыяс-Канеля Бермудэса ў Беларусь.

Падпісанне дарожнай карты стала прадаўжэннем развіцця дружалюбных беларуска-кубінскіх сувязей і палітычным вынікам візіту дэлегацыі партыі на чале са старшынёй Вольгай Чамаданавай у Рэспубліку Куба.

Бакі ўзялі на сябе абавязацельствы па каардынацыі дзеянняў на міжнароднай арэне ў мэтах умацавання суверэнітэту Беларусі і Кубы. Таксама, згодна з дакументам, бакі дамовіліся аб узаемных візітах, абмене інфармацыяй палітычнага зместу і звесткамі аб значных мерапрыемствах міжнароднага характару, запланаваных да правядзення на Кубе і ў Беларусі, узаемным вывучэнні вопыту партыйнага будаўніцтва.

Як паведамілі ў партыі "Белая Русь", асобныя палажэнні дарожнай карты прысвечаны ўзаемадзеянню з органамі дзяржаўнай улады і суб'ектамі гаспадарання ў мэтах пашырэння гандлёва-эканамічных сувязей паміж Беларуссю і Кубай.

У галіне маладзёжнай палітыкі прадугледжваецца арганізацыя рэгулярных анлайн-сустрэч і абмен дэлегацыямі паміж маладзёжным рухам "Іскра" і Саюзам маладых камуністаў Кубы.

Дарожная карта накіравана на паглыбленне ўзаемадзеяння дзвюх партый, з'яўляецца дакументам партыйнага стратэгічнага планавання і сведчыць аб прыярытэтах Беларускай партыі "Белая Русь" і Кампартыі Кубы.

Афіцыйны візіт беларускай дэлегацыі ў Рэспубліку Куба пачаўся 13 кастрычніка. У шэрагу шматлікіх сустрэч ключавой стала сустрэча з першым сакратаром Цэнтральнага камітэта Камуністычнай партыі Кубы, Прэзідэнтам Кубы Мігелем Дыяс-Канелем Бермудэсам.

Прэзідэнт Рэспублікі Куба адзначыў, што правядзенне такіх перагавораў з кіраўніцтвам вядучай палітычнай партыі Беларусі сведчыць аб выдатных двухбаковых і міжпартыйных адносінах. Мігель Дыяс-Канель Бермудэс падкрэсліў важнае значэнне такіх перагавораў у кантэксце ўмацавання супрацоўніцтва паміж Мінскам і Гаванай, адзначыў, што выбудоўванне сувязей з Беларуссю з'яўляецца прыярытэтам кубінскай знешняй палітыкі.

Лідар Кубы ўспомніў пра свой нядаўні візіт у Мінск і ўдзел у пасяджэнні Вышэйшага Еўразійскага эканамічнага савета і Еўразійскім эканамічным форуме ў чэрвені 2025 года, асабліва пра сустрэчу са "сваім сябрам і братам" Аляксандрам Лукашэнкам. "Нягледзячы на візіты шэрага лідараў дзяржаў, Прэзідэнт Беларусі ўдзяліў значны час кубінскай дэлегацыі. У нас адбыліся вельмі плённыя размовы, і ў сваім выступленні на саміце ён выказаў добрыя словы ў адрас нашай краіны", - сказаў Прэзідэнт Рэспублікі Куба.

Вольга Чамаданава асабліва адзначыла мужнасць кубінскага народа, які на працягу больш як 60 гадоў процістаіць знешняй агрэсіі, эканамічнай блакадзе і абараняе ідэалы сацыяльнай роўнасці і справядлівасці, змагаецца за права ісці ўласным, незалежным шляхам. На яе думку, падобнае высокае пачуццё нацыянальнай годнасці, імкненне да суверэнітэту і пабудовы справядлівага светапарадку аб'ядноўвае Беларусь і Кубу, якія з'яўляюцца саюзнікамі на міжнароднай арэне.

"Без сумнення, партнёрскія адносіны паміж нашымі партыямі будуць садзейнічаць развіццю адносін паміж нашымі краінамі. Ніякія геаграфічныя адлегласці або блакады не стануць перашкодай для нашай дружбы", - выказала ўпэўненасць Вольга Чамаданава.

На заканчэнне сустрэчы па прапанове беларускай дэлегацыі бакі дамовіліся аб правядзенні ў Мінску шэрага мерапрыемстваў, прысвечаных ідэйна-палітычнай спадчыне Фідэля Кастра і прымеркаваных да стагоддзя з дня нараджэння легендарнага камандантэ.

У ходзе візіту дэлегацыі таксама адбылося падпісанне пагаднення аб супрацоўніцтве паміж Нацыянальнай бібліятэкай Беларусі і Нацыянальнай бібліятэкай Кубы імя Хасэ Марці. Дакумент прадугледжвае абмен вопытам, правядзенне сумесных культурна-адукацыйных праектаў, а таксама развіццё лічбавых рэсурсаў і ініцыятыў па папулярызацыі беларускай і кубінскай культуры. Пагадненне адкрывае новыя магчымасці для ўмацавання двухбаковых адносін і пашырэння супрацоўніцтва ў сферы культуры і навукі.

версія для друку

зрабіць стартавай

дабавіць у выбранае