Падзеі

15 красавіка, Мінск /Кар. БЕЛТА/. Беларуская парламенцкая дэлегацыя на чале са старшынёй Савета Рэспублікі Нацыянальнага сходу Міхаілам Мясніковічам прыме ўдзел у пасяджэнні Савета Міжпарламенцкай асамблеі дзяржаў - удзельніц СНД і ўрачыстым пленарным пасяджэнні, прысвечаным 70-годдзю Перамогі, якія пройдуць 16-17 красавіка ў Санкт-Пецярбургу, паведамляе карэспандэнт БЕЛТА.

Ад Савета Рэспублікі ў Санкт-Пецярбург таксама будуць накіраваны сенатары Уладзімір Сянько, Уладзімір Панцюхоў і Дзмітрый Чарнякоў. Ад Палаты прадстаўнікоў у мерапрыемствах будуць удзельнічаць дэпутаты Уладзімір Базанаў, Інеса Кляшчук, Валянціна Лявоненка, Андрэй Навумовіч, Генадзь Пальчык, Валерый Гайдукевіч і Наталля Гуйвік.

Як паведамілі ў прэс-службе Выканаўчага камітэта СНД, члены савета разгледзяць некалькі дзясяткаў актуальных пытанняў, абмяркуюць падрыхтаваныя Міжпарламенцкай асамблеяй дакументы і заслухаюць выступленні дакладчыкаў. Да 70-годдзя Вялікай Перамогі распрацаваны і ўносяцца на пленарнае пасяджэнне два мадэльныя законы - "Аб увекавечанні памяці загінулых пры абароне Айчыны" і "Аб патрыятычным выхаванні".

Да 70-годдзя Перамогі Міжпарламенцкая асамблея СНД праводзіць шэраг мерапрыемстваў, у тым ліку маштабную акцыю "Эстафета Памяці". У сталіцах Садружнасці дэлегацыі МПА наведвалі самыя буйныя мемарыялы, устаноўленыя ў памяць аб загінулых у Вялікай Айчыннай вайне, і ў спецыяльных капсулах везлі адтуль часцінкі Вечнага агню, сустракаліся з ветэранамі, якія пражываюць на прасторы Садружнасці.

У фінальнай урачыстай цырымоніі акцыі прадстаўнікі парламентаў дзяржаў - удзельніц МПА СНД аб'яднаюць часцінкі полымя ў адзін вялікі факел - адзіны агонь Садружнасці, які будзе перададзены ў філіял Дзяржаўнага музея гісторыі Санкт-Пецярбурга - "Манумент гераічным абаронцам Ленінграда".