Падзеі

Новыя паліклінікі і карпусы бальніц. Прэзідэнту далажылі аб развіцці сістэмы аховы здароўя Мінска

3 красавіка, Мінск /Кар. БЕЛТА/. Прэзідэнту Беларусі Аляксандру Лукашэнку ў час наведвання новай 42-й паліклінікі ў мікрараёне Усходні было даложана аб развіцці сістэмы аховы здароўя Мінска, перадае карэспандэнт БЕЛТА.

Як растлумачыў старшыня Мінгарвыканкама Уладзімір Кухараў, некалькі гадоў таму, прааналізаваўшы сітуацыю ў сістэме аховы здароўя, гарадскія ўлады вызначыліся, якія аб'екты трэба кропкава прывесці ў парадак, а дзе - пабудаваць новыя. Рашэнні пры гэтым прымаліся не агулам, а зыходзячы з рэальнай неабходнасці, рацыянальнага падыходу. "Было вызначана, каб у некаторых клінічных бальніцах не будаваць новае, а рабіць проста прыбудову, дабавіць аддзяленні, недзе - дабавіць урачоў. А калі нешта будаваць новае, мы перапрацавалі ўсе праекты для таго, каб яны былі кампактнымі, не было вялікіх фае, калідораў, а толькі тое, што патрэбна для работы", - агучыў агульныя прынцыповыя падыходы кіраўнік Мінгарвыканкама.

"Бачым, што ўжо няма неабходнасці паліклінікі, бальніцы будаваць новыя і рэканструяваць тыя, якія ёсць. Мы зрабілі гэту работу", - падкрэсліў ён і прывёў шэраг прыкладаў.

Новая паліклініка пабудавана ў Сухараве, амбулаторыя - у Сокале. У Лошыцы з улікам росту мікрараёна і ўвядзення ў строй новых дамоў патрабавалася асобная дзіцячая паліклініка, і яна ўведзена ў эксплуатацыю. Дзіцячая і дарослая паліклінікі з'явіліся ў "Мінск-Міры", і, як лічаць улады сталіцы, там пакуль няма неабходнасці будаўніцтва медустаноў. Рэканструявана і працуе 13-я гарадская паліклініка. У мікрараёне Усходні з удзелам кіраўніка дзяржавы адкрыта 42-я паліклініка. Ёсць упэўненасць, што яе з'яўленне было неабходна з улікам росту колькасці насельніцтва раёна і планаў па будаўніцтве новых дамоў. На месцы існуючых тут даўгабудаў улады Мінска разлічваюць узвесці тры дамы - для шматдзетных, для маючых патрэбу і ў якасці арэнднага жылля.

Што датычыцца больш буйных медцэнтраў, то была поўнасцю рэканструявана 5-я гарадская клінічная бальніца, новы корпус пабудаваны ў 4-й ГКБ. У Мінскім навукова-практычным цэнтры хірургіі, транспланталогіі і гематалогіі прыбудаваны новы блок, устаноўлена самае сучаснае абсталяванне, праводзяцца ўнікальныя аперацыі.

На месцы даўгабуда па вуліцы Маякоўскага адкрыты тры медустановы: 10-я гарадская стаматалагічная паліклініка, гарадскі эндакрыналагічны цэнтр і клінічны цэнтр пластычнай хірургіі і медыцынскай касметалогіі.

Яшчэ адзін былы даўгабуд - у раёне вуліцы Карвата - сіламі горада рэканструявалі і адкрылі там новы сучасны корпус Мінскага гарадскога клінічнага наркалагічнага цэнтра, і цяпер у адным месцы аказваюць усе этапы наркалагічнай дапамогі, робячы асаблівы ўпор на рэабілітацыі.

Цяпер вядзецца будаўніцтва паліклінікі Мінскага гарадскога клінічнага анкалагічнага цэнтра. Ранейшы будынак прыйшоў у непрыдатнасць, знаходзіўся ў аварыйным стане. На яго месцы ўзводзіцца новы. "Да канца года мы ўсе будаўнічыя работы завершым, і ў пачатку года (2027-га. - Заўвага БЕЛТА) яе адкрыем", - сказаў старшыня Мінгарвыканкама.

На базе 6-й гарадской бальніцы ўзводзяцца два новыя корпусы. Увесці іх у эксплуатацыю плануецца ў наступным годзе.

Прадаўжаецца таксама ўзвядзенне новага будынка для гарадской інфекцыйнай бальніцы ў раёне Даўгінаўскага тракту. Яго ўзводзяць дынамічнымі тэмпамі за кошт прымянення для будаўніцтва лёгкіх стальных канструкцый. "Вельмі хутка, зручна. Фактычна ўмовы надвор'я не ўплываюць", - заўважыў Уладзімір Кухараў.