Падзеі

МЗС: працуем над тым, каб уся кантынентальная Паўднёва-Усходняя Азія стала бязвізавай зонай для беларускіх турыстаў

Фота pexels

8 снежня, Мінск /Кар. БЕЛТА/. МЗС працуе над тым, каб уся кантынентальная Паўднёва-Усходняя Азія стала бязвізавай зонай для беларускіх турыстаў. Аб гэтым паведаміў журналістам першы намеснік міністра замежных спраў Беларусі Сяргей Лукашэвіч у Мінску на мерапрыемстве, прысвечаным старту палётнай праграмы "Белавія" ў Тайланд, паведамляе карэспандэнт БЕЛТА.

Сяргей Лукашэвіч адзначыў, што Беларусь літаральна "ўварвалася" ў Паўднёва-Усходнюю Азію. Нядаўна адкрыты рэйсы ў В'етнам, на Шры-Ланку.

"Сёння настала чарга Тайланда. Вядома, гэтаму ўсяму папярэднічае планамерная работа Міністэрства замежных спраў. У ліпені гэтага года міністр замежных спраў Максім Рыжанкоў наведаў Тайланд, гаварылі з калегамі аб адкрыцці гэтага рэйса, - адзначыў Сяргей Лукашэвіч. - Планамерна працуем над тым, каб уся кантынентальная Паўднёва-Усходняя Азія стала такой бязвізавай зонай для беларускіх турыстаў".

Паводле яго слоў, прамыя рэйсы - аснова для таго, каб палітычныя, эканамічныя, гуманітарныя і турыстычныя адносіны толькі ўмацоўваліся. Напрамак Паўднёва-Усходняй Азіі запатрабаваны, уключаючы запуск прамых авіязносін. Турызм садзейнічае далейшаму развіццю і гандлёва-эканамічных кантактаў, і палітычнага ўзаемадзеяння.

"Адкрыццё рэйсаў у Тайланд - жамчужына ў каралях нашых намаганняў па збліжэнні з краінамі Паўднёва-Усходняй Азіі", - сказаў Сяргей Лукашэвіч. Ён дадаў, што ёсць дамоўленасць з калегамі ў Тайландзе аб падпісанні пагаднення аб бязвізавым рэжыме для ўладальнікаў звычайных пашпартоў. Аналагічныя пагадненні падпісаны з М'янмай, Лаосам і ўступілі ў сілу з В'етнамам.

"Працуем як па падпісанні пагадненняў, так і па паскарэнні іх ратыфікацыі. І падштурхоўваем нашых партнёраў, каб яны прыкладвалі такія ж намаганні", - адзначыў Сяргей Лукашэвіч.

Як паведамлялася, з 8 студзеня стартуюць рэйсы Мінск - Патая (аэрапорт Утапаа), з 11 студзеня - на Пхукет. Білеты даступны ў складзе турпакетаў: падрабязнасці пералёту, кошт і іншую актуальную інфармацыю можна ўдакладніць у турыстычных аператараў.

Рэйсы ва Утапаа і на Пхукет будуць выконвацца раз у 10/11 дзён на новых самалётах Airbus A330. Арыенціровачны час у палёце складзе 10 гадзін, назад - каля 11.

версія для друку

зрабіць стартавай

дабавіць у выбранае