Падзеі

МЗС: Беларусь падключылася да вышуку падазроных у тэракце на тэрыторыі Польшчы

Фота з архiва

21 лістапада, Мінск /Кар. БЕЛТА/. Кампетэнтныя органы Беларусі і Польшчы сумесна ўстанаўліваюць месцазнаходжанне двух грамадзян Украіны, якія падазраюцца ва ўчыненні злачынстваў тэрарыстычнага характару ў Польшчы. Аб гэтым журналістам заявіў прэс-сакратар Міністэрства замежных спраў Беларусі Руслан Варанкоў, перадае карэспандэнт БЕЛТА.

"Кампетэнтнымі органамі Рэспублікі Беларусь і Рэспублікі Польшча праводзяцца сумесныя мерапрыемствы па ўстанаўленні месцазнаходжання двух грамадзян Украіны, якія падазраюцца ва ўчыненні на тэрыторыі Польшчы злачынстваў тэрарыстычнага характару", - сказаў Руслан Варанкоў.

Прэс-сакратар МЗС адзначыў, што цяпер пацверджаны факт іх уезду на тэрыторыю Беларусі, дзе праводзяцца ўжо актыўныя вышуковыя мерапрыемствы.

"Сумесна з польскім бокам адпрацоўваюцца кантакты падазроных, а таксама ажыццяўляецца комплекс іншых аператыўных мер. У выпадку ўстанаўлення месцазнаходжання названых асоб на тэрыторыі Рэспублікі Беларусь яны будуць затрыманы. У далейшым ва ўстаноўленым парадку і з улікам усіх абставін, якія адносяцца да справы, будзе разгледжана пытанне аб іх перадачы польскаму боку", - дадаў Руслан Варанкоў.

Паводле яго слоў, гэта работа праводзіцца ў духу партнёрства і добрасуседства, нягледзячы на тое, што з боку Польшчы да гэтага часу не паступіў належным чынам аформлены запыт аб прававой дапамозе па гэтым пытанні.

версія для друку

зрабіць стартавай

дабавіць у выбранае