Падзеі

Марат Маркаў назначаны міністрам культуры Беларусі

9 красавіка, Мінск /Кар. БЕЛТА/. Марат Маркаў, які да гэтага часу ўзначальваў Міністэрства інфармацыі, назначаны міністрам культуры Беларусі. Адпаведнае кадравае рашэнне прыняў Прэзідэнт Беларусі Аляксандр Лукашэнка, перадае карэспандэнт БЕЛТА.

Аляксандр Лукашэнка нагадаў вядомую фразу аб тым, што найважнейшым з мастацтваў з'яўляецца кіно. "Не я гэта сказаў, але абсалютна падтрымліваю. Тое, што мы закінулі кіно, гэта нікуды не варта", - падкрэсліў беларускі лідар.

"Калі мне далажылі аб тым, што Марат Сяргеевіч просіць, каб яго назначылі міністрам культуры, я крыху здзівіўся, але вітаў гэта. Дай бог, каб уздым кіравання культурай у нас пачаўся з цябе. Я буду толькі рады. Чалавек, які вырас на маіх вачах. Я буду толькі рады", - сказаў Прэзідэнт наконт кандыдатуры на пасаду міністра культур.

Кіраўнік дзяржавы адзначыў, што Марат Маркаў ужо мае вопыт міністэрскай працы. "З аднаго крэсла міністэрскага на больш сур'ёзнае і адказнае, скажам так, перасаджваецца. Адказнае і сур'ёзнае, таму што ў нас не атрымлівалася ў папярэдніх міністраў эфектыўна працаваць. Ёсць такое перакананне, што ты, Марат, з гэтым справішся. Ды і іншага выбару ў нас няма, мужыкі", - падкрэсліў Аляксандр Лукашэнка.

Біяграфія Маркава М.С.

Маркаў Марат Сяргеевіч нарадзіўся ў 1969 годзе ў горадзе Лунінец Брэсцкай вобласці. У 1991 годзе скончыў Мінскае вышэйшае інжынернае зенітнае ракетнае вучылішча проціпаветранай абароны, у 1998-м - Беларускі дзяржаўны ўніверсітэт па спецыяльнасці "правазнаўства", у 2013-м - Акадэмію кіравання пры Прэзідэнце Рэспублікі Беларусь па спецыяльнасці "дзяржаўнае кіраванне нацыянальнай эканомікай".

У пачатку працоўнай кар'еры служыў на розных ваенных пасадах, у тым ліку ў Ваеннай акадэміі Рэспублікі Беларусь.

З 2003 па 2011 год працаваў у Адміністрацыі Прэзідэнта Беларусі. З 2009 па 2011 год - на пасадзе першага намесніка начальніка галоўнага ўпраўлення - начальніка ўпраўлення па каардынацыі ідэалагічнай работы галоўнага ідэалагічнага ўпраўлення.

У 2011-2017 гадах - намеснік старшыні Нацыянальнай дзяржаўнай тэлерадыёкампаніі Рэспублікі Беларусь.

З 2017-га па чэрвень 2024 года - старшыня праўлення ЗАТ "Другі нацыянальны тэлеканал".

У 2024-2026 гадах - міністр інфармацыі.

З 9 красавіка 2026 года - міністр культуры.

Узнагароджаны медалём "За працоўныя заслугі".