Падзеі

Лукашэнка заслухаў даклад па Магілёўскай вобласці. Галоўная тэма - сітуацыя ў сельскай гаспадарцы

Фота з архiва

4 лютага, Мінск /Кар. БЕЛТА/. Прэзідэнт Беларусі Аляксандр Лукашэнка 4 лютага заслухаў даклад старшыні Магілёўскага абласнога выканаўчага камітэта Анатоля Ісачанкі, паведамляе БЕЛТА.

У час даклада размова ішла пра стан спраў у рэгіёне ў развіццё праведзенай у аўторак нарады па Віцебскай вобласці. Як адзначаў напярэдадні кіраўнік дзяржавы, многія абазначаныя праблемныя моманты ў той ці іншай ступені ўласцівыя і для іншых рэгіёнаў краіны.

Галоўная тэма даклада губернатара Магілёўскай вобласці - стан спраў у сельскай гаспадарцы ў рэгіёне ў цэлым з акцэнтам на асобныя найбольш актуальныя і праблемныя пытанні.

У прыватнасці, Прэзідэнта цікавіла сітуацыя па падзяжы жывёлы. Як было даложана, у шэрагу гаспадарак і раёнаў фіксуюцца негатыўныя тэндэнцыі па прычыне невыканання тэхналогіі, безгаспадарчасці, адсутнасці дысцыпліны на месцах. Для выпраўлення сітуацыі створаны мабільныя групы, якія выязджаюць у гаспадаркі, аказваюць неабходную кансультацыйную і іншую дапамогу.

Кіраўнік дзяржавы таксама цікавіўся тым, як у цэлым праходзіць зімоўка жывёлы, наколькі забяспечаны патрэбнасці ў кармах. У сувязі з гэтым разгледжана і работа камбікормавых прадпрыемстваў вобласці - іх вытворчыя магутнасці цалкам загружаны, усе пытанні вырашаны.

Асобнай тэмай даклада стала загрузка абласных прадпрыемстваў мяса-малочнай галіны. Сітуацыя адносна гэтага палепшылася. Па мясе, напрыклад, магутнасці загружаны ў сярэднім на 90 працэнтаў.

Кіраўнік вобласці таксама далажыў аб будаўніцтве і рэканструкцыі аб'ектаў у Шклове (размова аб праектах, якія знаходзяцца на кантролі кіраўніка дзяржавы). Гэта комплекс арганізацый, які ўключае камбікормавы завод, аграсэрвіс, сельгасхімію, новае малакаперапрацоўчае прадпрыемства. У бягучым годзе ўсе аб'екты будуць поўнасцю ўведзены ў строй.

версія для друку

зрабіць стартавай

дабавіць у выбранае