Падзеі

Лукашэнка расказаў, як Польшча сарвала дамоўленасць аб абмене, у тым ліку Пачобута

31 кастрычніка, Лепельскі раён /Кар. БЕЛТА/. Польшча сарвала папярэднюю дамоўленасць аб абмене з Беларуссю. Заявы аб гэтым Прэзідэнт Беларусі Аляксандр Лукашэнка зрабіў у час рабочай паездкі ў Віцебскую вобласць, перадае карэспандэнт БЕЛТА.

"У нас з палякамі былі кантакты. Яны просяць там гэтых Пачобутаў (асуджаны ў Беларусі Анджэй Пачобут. - Заўвага БЕЛТА), шпіёнаў прызнаюць. Яны затрыманы. "Аддайце (просіць польскі бок. - Заўвага БЕЛТА)". Мы ім кажам: "Ну добра, там 2-3 чалавекі нашых ёсць. Вяртайце. Правядзём абмен". Таксама ж сем'і і гэтак далей. Разведка была, ёсць і будзе. Я прызнаю гэта, паважаю. Добра, абмяняем. Пачобута хочаце - мы гатовы пайсці і на гэта. "Ой, дзякуй вам і іншае, мы гатовы з вамі размаўляць, мы адкрываем пункты пропуску, яшчэ нешта", - расказаў кіраўнік дзяржавы пра існаваўшыя папярэднія дамоўленасці.

Аднак, паводле яго слоў, пазіцыя польскага боку змянілася. "Учора бліжэй да ночы мне дакладвае КДБ: "Не, яны адступілі ад гэтай пазіцыі ў знак салідарнасці з Літвой за гэтыя вось шарыкі". Я гавару: перадайце ім прывітанне. Адступілі - ну і мы адступім. Мы на паўзу ставім. Калі будзеце гатовы - прыходзьце, будзем з вамі размаўляць".

"Мы адкрыты да гэтага дыялогу і размовы без нагнятання сітуацыі. Не таму, каб лоб у лоб. Гэта не трэба. Я не прыхільнік гэтага. Заўсёды трэба шукаць кампрамісы. Але адыходзіць можна да сценкі, пакуль ты не ўпрэшся ў нешта. Ну, я адступаю. Але гэта сценка - усё, - заявіў Аляксандр Лукашэнка. - І потым, калі тым ім робіш нейкія крокі (насустрач. - Заўвага БЕЛТА), чалавечыя крокі, яны гэтага не разумеюць. Яны гэта разумеюць як слабасць. І амерыканцы, і ўсе іншыя. Ды не ў слабасці справа. А справа ў тым, што я не магу далей адступаць. Не магу".

"Я амерыканцам кажу: у мяне свае людзі ёсць, якія ацэньваюць мяне па канкрэтных кроках. Яны бачаць: "А, Лукашэнка там гэта адступіць, гэтага, гэтага вызваліў… А навошта, а не трэба, няхай бы сядзеў". А яны ж не валодаюць той інфармацыяй, а я вочы ў вочы не магу ім усё гэта расказаць", - дадаў беларускі лідар.

Як паведамлялася, Польшча заяўляла аб гатоўнасці адкрыць у лістападзе пункты пропуску ў Баброўніках і Кузніцы на мяжы з Беларуссю. Аднак затым адклала гэта на фоне рашэння Літвы на месяц поўнасцю закрыць аўтатранспартную граніцу з Беларуссю. Літва ж у сваю чаргу матывавала закрыццё граніцы ў тым ліку інцыдэнтамі з залётам з тэрыторыі Беларусі метэаралагічных зондаў, якія выкарыстоўваліся для кантрабанды цыгарэт.

Як расказаў Аляксандр Лукашэнка, у ходзе разбору высветлілася, што запускам гэтых шароў займаліся самі літоўцы з тэрыторыі Беларусі.

версія для друку

зрабіць стартавай

дабавіць у выбранае