Падзеі

Лукашэнка павіншаваў Пуціна з Днём Расіі

Фота з архiва

12 чэрвеня, Мінск /Кар. БЕЛТА/. Прэзідэнт Беларусі Аляксандр Лукашэнка павіншаваў Прэзідэнта Расіі Уладзіміра Пуціна і ўсіх расіян з Днём Расіі. Аб гэтым БЕЛТА паведамілі ў прэс-службе беларускага лідара.

"Расійская Федэрацыя - упэўненая ў сваёй сіле перадавая дзяржава, адна з вядучых дзяржаў з магутным эканамічным і абаронным патэнцыялам, гарант справядлівага светаўладкавання ва ўмовах глабальнай трансфармацыі", - гаворыцца ў віншаванні.

"Беларусы заўсёды ішлі з расіянамі поплеч на шматвяковым гераічным шляху. Памяць аб сумесным пераадоленні выпрабаванняў, агульных дасягненнях і перамогах перадаецца з пакалення ў пакаленне. Менавіта правераная гадамі беларуска-расійская дружба дае невычэрпную энергію для далейшага гарманічнага развіцця нашых братэрскіх краін і народаў", - адзначыў Прэзідэнт Беларусі.

Аляксандр Лукашэнка пажадаў Уладзіміру Пуціну моцнага здароўя і выдатных поспехаў у імя Айчыны, а грамадзянам Расіі - шчасця і дабрабыту.

Віншавальныя пасланні ад Прэзідэнта Беларусі таксама накіраваны старшыні ўрада Расіі, старшыні Савета Міністраў Саюзнай дзяржавы Міхаілу Мішусціну, старшыні Савета Федэрацыі Валянціне Мацвіенка і старшыні Дзяржаўнай думы, старшыні Парламенцкага сходу Саюза Беларусі і Расіі Вячаславу Валодзіну.

версія для друку

зрабіць стартавай

дабавіць у выбранае