Падзеі

Лукашэнка пацвердзіў гатоўнасць адкрыць украінцам беларускае прыгранічча для збору грыбоў і ягад

25 чэрвеня, Мінск /Кар. БЕЛТА/. Прэзідэнт Беларусі Аляксандр Лукашэнка пацвердзіў гатоўнасць адкрыць украінцам доступ у беларускае прыгранічча для збору дзікаросаў, як у былыя гады. Адпаведныя заявы кіраўнік дзяржавы зрабіў на сустрэчы з губернатарам Маскоўскай вобласці Андрэем Вараб'ёвым, перадае карэспандэнт БЕЛТА.

Кіраўнік дзяржавы расказаў, што зусім нядаўна даручыў, каб пагранічнікі разам з мясцовымі ўладамі Гомельскай і Брэсцкай абласцей адпрацавалі варыянты наведвання ўкраінцамі даўно вядомых ім месцаў на тэрыторыі Беларусі. "Украінскае прыгранічча (насельніцтва прыгранічных з Беларуссю тэрыторый. - Заўвага БЕЛТА) заўсёды прыходзіла да нас на тэрыторыю, збіралі грыбы, ягады. Да вайны яшчэ. Па $5-6 тыс. зараблялі грошай. Для таго, каб пражыць. Што, лёгка было ва Украіне да вайны? Вельмі цяжка. Мы адкрывалі ім дарогу", - расказаў Прэзідэнт.

Ён падкрэсліў, што нават у цяперашніх умовах Беларусь гатова адкрыць гэтыя ж пункты: "Каб украінцы прыйшлі да нас, як гэта было звычайна, - на балотах, усюды (яны ведаюць лепш за нас гэтыя месцы) - збіралі гэтыя дзікаросы і прадавалі. Мы ж разумеем, што там складана і цяжка".

"Калі ўкраінскія ўлады (яны ж ім забараняюць) адмовяцца ад гэтай палітыкі і дазволяць пераходзіць у Беларусь нарыхтоўваць грыбы, ягады, няхай нарыхтоўваюць і прадаюць. Мы гэтага не баімся. Мы зможам пракантраляваць кожнага чалавека, які перамесціцца сюды з добрымі намерамі", - заявіў Аляксандр Лукашэнка.

версія для друку

зрабіць стартавай

дабавіць у выбранае