Падзеі

Лукашэнка: Палессе трэба прыводзіць да ладу

4 кастрычніка, Ляскавічы /Кар. БЕЛТА/. Прэзідэнт Беларусі Аляксандр Лукашэнка ў ходзе рабочай паездкі ў Петрыкаўскі раён Гомельскай вобласці нагадаў аб задачах па развіцці Палесся, перадае карэспандэнт БЕЛТА.

"Свет перадзяліць хочуць. Нам няма куды дзявацца. Нам трэба выжыць. А вяртацца да палешукоў - у лапцях хадзіць (як некалі. - Заўвага БЕЛТА) - не хочацца. Таму трэба Палессе прыводзіць да ладу", - сказаў кіраўнік дзяржавы.

Ён нагадаў аб праграме, якую ў гэтых адносінах рэалізуюць у краіне.

Кіраўнік дзяржавы падкрэсліў важнасць меліярацыі, асабліва на Палессі. "Землі прыродзе аддаваць нельга. У нас меліяраваныя землі. Трэба іх даглядаць", - сказаў беларускі лідар.

Ён таксама заявіў, што варта нармальна плаціць гаспадаркам, якія бяруць на сябе работы па меліярацыі і абслугоўванні меліярацыйных сістэм. "Дзяржаўная справа - глеба, землі, меліярацыя. Дзяржава павінна заплаціць. Вы дапамагаеце ўводзіць у севазварот землі. І на гэтым капейку можаце зарабіць", - дадаў Прэзідэнт.

Як паведамлялася БЕЛТА, у студзені бягучага года была зацверджана праграма развіцця раёнаў Прыпяцкага Палесся на 2025-2030 гады. Яна была распрацавана ў адпаведнасці з даручэннем Прэзідэнта Беларусі.

Рэалізацыя дакумента накіравана на рост дабрабыту і якасці жыцця насельніцтва раёнаў Прыпяцкага Палесся: Ганцавіцкага, Лунінецкага, Столінскага і Пінскага раёнаў Брэсцкай вобласці, Ельскага, Жыткавіцкага, Калінкавіцкага, Лельчыцкага і Петрыкаўскага раёнаў Гомельскай вобласці. Аснова росту - павышэнне эфектыўнасці выкарыстання ўнікальнага прыродна-рэсурснага патэнцыялу, умацаванне прамысловага комплексу, укараненне лепшых практык работы на зямлі, фарміраванне камфортнага асяроддзя, якое спалучае асаблівасці і перавагі сельскага ўкладу жыцця з гарадскімі стандартамі інфраструктурнага ўладкавання і сэрвіснага абслугоўвання. Яшчэ адна мэта - фарміраванне доўгатэрміновай асновы ўстойлівага росту эканомікі.

версія для друку

зрабіць стартавай

дабавіць у выбранае