Падзеі

Лукашэнка даручыў прадумаць стымулы для замацавання ўнутры краіны таленавітай моладзі

17 кастрычніка, Мінск /Кар. БЕЛТА/. Прэзідэнт Беларусі Аляксандр Лукашэнка даручыў прадумаць стымулы для замацавання ўнутры краіны таленавітай моладзі. Адпаведныя заявы ён зрабіў, наведваючы ў Мінску Цэнтр тэхнічнай творчасці дзяцей і моладзі, перадае карэспандэнт БЕЛТА.

"Я намякаю на тое, каб вы не страцілі талковых людзей. А попыт каласальны на нашу моладзь, нашых студэнтаў", - адзначыў кіраўнік дзяржавы.

Аляксандр Лукашэнка падкрэсліў, што трэба старацца ўтрымліваць перспектыўныя кадры ў Беларусі, ствараючы для гэтага неабходныя ўмовы. "Сілай не ўтрымаеш цяпер. Трэба ствараць адпаведныя інтарэсы", - сказаў ён.

У Цэнтры тэхнічнай творчасці дзяцей і моладзі ў Мінску кіраўніку дзяржавы далажылі аб сістэме дадатковай адукацыі дзяцей і моладзі ў Мінску, а таксама перспектывах развіцця тэхнічнай творчасці. Паводле слоў старшыні Мінскага гарвыканкама Уладзіміра Кухарава, установы дадатковай адукацыі ў сталіцы наведваюць каля 70 тыс. дзяцей. Пры гэтым перавагу навучэнцы аддаюць у асноўным гуманітарным і мастацкім напрамкам, у той час як да тэхнічнага напрамку яны праяўляюць менш цікавасці.

Разам з тым, праінфармаваў ён, у Мінску дзейнічае 141 інжынерны клас, у якім займаюцца амаль 2,5 тыс. навучэнцаў. Шэраг прадпрыемстваў і навучальных устаноў зацікаўлены ў рабоце з інжынернымі класамі і падрыхтоўцы кадраў для высокатэхналагічных галін.

"Патрэбны быў цэнтр, які будзе даваць неабходныя веды з шасцігадовага ўзросту і дапаможа знайсці сябе", - адзначыў Уладзімір Кухараў. Цэнтр тэхнічнай творчасці дзяцей і моладзі ў Мінску ўключае 18 вучэбных лабараторый, якія аснашчаны ўсім неабходным абсталяваннем для навучання найноўшым тэхналогіям. "Усяго тут будуць навучацца, калі браць у разрэзе месяца, 7,5 тыс. навучэнцаў, (будзе. - Заўвага БЕЛТА) 281 аб'яднанне па інтарэсах", - сказаў старшыня Мінгарвыканкама.

Міністр адукацыі Андрэй Іванец адзначыў, што па краіне ў цэлым дзейнічае 180 інжынерна-тэхнічных цэнтраў для школьнікаў. Паводле яго слоў, такія цэнтры ёсць у кожным раёне. На ўзроўні абласных цэнтраў і Мінска створаны буйныя цэнтры тэхнічнай творчасці, а своеасаблівай верхавінай піраміды з'яўляецца Нацыянальны дзіцячы тэхнапарк. "Сёння 80 працэнтаў праектаў у Нацыянальным дзіцячым тэхнапарку выконваюцца па заказах прадпрыемстваў. За кожнай лабараторыяй (іх там 15) замацаваны профільныя міністэрствы", - паведаміў Андрэй Іванец.

Паводле слоў міністра, падтрымка, якую дзяржава аказвае адораным дзецям, ужо дае свае вынікі. У гэту ўступную кампанію 90 працэнтаў пераможцаў рэспубліканскіх і міжнародных алімпіяд і амаль 100 працэнтаў медалістаў паступілі ў беларускія ВНУ.

версія для друку

зрабіць стартавай

дабавіць у выбранае