Падзеі

Лукашэнка даручыў мінімізаваць усе рызыкі ў перыяд уборачнай

18 ліпеня, Мінск /Кар. БЕЛТА/. Прэзідэнт Беларусі Аляксандр Лукашэнка 18 ліпеня на селектарнай нарадзе па пытаннях уборачнай кампаніі даручыў мінімізаваць усе рызыкі ў перыяд правядзення палявых работ, перадае карэспандэнт БЕЛТА.

Кіраўнік дзяржавы адзначыў, што ў краіне ідзе важнейшы этап сельскагаспадарчых работ, які як ніколі вызначыць вагу рэспубліканскага каравая ў гэтым годзе.

"Уборку збожжавых, зернебабовых і іншых культур могуць ускладніць і дажджы, і шквалісты вецер, і высокая тэмпература - любы неспрыяльны фактар навакольнага асяроддзя. Усё гэта аб'ектыўныя акалічнасці, негатыўны ўплыў якіх прагназуемы: паляганне пасеваў, вегетацыя пустазелля, а таксама магчымае прарастанне збожжа. Любыя рызыкі можна і трэба мінімізаваць. Для гэтага і збіраемся - каб абазначыць праблемныя пытанні, узгадніць падыходы, выпрацаваць стратэгію ўборачнай кампаніі ў такіх умовах", - сказаў Аляксандр Лукашэнка.

У сувязі з частковым паляганнем пасеваў кіраўнік дзяржавы ўдакладніў, ці ўсе камбайны абсталяваны сцеблапад'ёмнікамі і дзялільнікамі для ўборкі палеглага збожжа.

"У вытворчасці прадукцыі сельскай гаспадаркі за паўгоддзе мы бачым недабор крыху больш за 2 працэнты да ўзроўню мінулага года. Так, уніз нас цягне гадоўля свінапагалоўя, слабыя тэмпы нарыхтоўкі кармоў. Але неабходна не дапусціць спаду паказчыкаў па выніках года і пастарацца кампенсаваць недабор за кошт раслінаводчай прадукцыі. Зразумела, што першы ўкос траў мы ўбралі вельмі рана - не атрымалі патрэбных аб'ёмаў, магчыма, і якасці. Але другі ўкос, у некага ўжо і трэці ўкос адрастаюць нядрэнныя, - канстатаваў Прэзідэнт. - Стаіць задача забяспечыць нестандартную арганізацыю працы, каб правесці нарыхтоўку кармоў і своечасовую ўборку збожжавых перш за ўсё. Зрабіць гэта трэба вельмі хутка, нягледзячы на тыя ўмовы надвор'я, якія складваюцца".

На першым месцы, звярнуў увагу Аляксандр Лукашэнка, тэхнічная гатоўнасць усяго ўборачнага комплексу. Паводле яго слоў, вырашальнае значэнне мае дакладная арганізацыя работ і дастойнае заахвочванне за якасную працу.

"Нагадаю: дзяржава для правядзення паспяховай уборачнай кампаніі зрабіла ўсё магчымае. Таму ад усіх - ад кіраўніка да механізатара - патрабуецца максімальная аддача", - падкрэсліў беларускі лідар.

версія для друку

зрабіць стартавай

дабавіць у выбранае