Падзеі

6 лістапада, Мінск /Уладзімір Мацвееў - БЕЛТА/. Беларусь, знаходзячыся паміж двума буйнейшымі цэнтрамі сілы, катэгарычна не зацікаўлена ў канфліктах - ні ў гарачых, ні ў замарожаных. Аб гэтым Прэзідэнт Беларусі Аляксандр Лукашэнка заявіў сёння на сустрэчы з групай амерыканскіх аналітыкаў, перадае карэспандэнт БЕЛТА.

"Вам як экспертам не толькі ў сферы знешняй палітыкі, але і ў ваенна-палітычных пытаннях не трэба тлумачыць, чым можа пагражаць нам любая ваенная канфрантацыя паміж Захадам і Усходам. Наша краіна катэгарычна не зацікаўлена ў канфліктах - ні ў гарачых, ні ў замарожаных. Ні ў суседзяў, ні тым больш на сваёй тэрыторыі", - падкрэсліў беларускі лідар.

Ён звярнуў увагу, што ваенная дактрына Беларусі мае выключна абарончы характар: "Мной не раз адзначалася, што з нашага боку ніколі не будзе зыходзіць пагроза суседзям".

Аляксандр Лукашэнка таксама ўпамянуў, што Беларусь знаходзіцца ў ваенным саюзе з Расіяй, у якой адносіны з Захадам цяпер не самыя лепшыя. "Тым не менш на тэрыторыі Беларусі да гэтага часу няма ніякіх баз іншых дзяржаў", - заўважыў Прэзідэнт.