Падзеі

Лідары краін СНД падпісалі пакет дакументаў па выніках саміту ў Душанбэ

10 кастрычніка, Душанбэ /Кар. БЕЛТА/. Лідары дзяржаў - удзельніц СНД па выніках саміту Садружнасці ў Душанбэ падпісалі пакет дакументаў, перадае карэспандэнт БЕЛТА.

Кіраўнікі дзяржаў Садружнасці падпісалі рашэнні аб заснаванні новага фармату - "СНД плюс" - і надзяленні ШАС статусам наглядальніка пры СНД. "СНД плюс" стане платформай для супрацоўніцтва краін СНД з іншымі дзяржавамі, іх аб'яднаннямі і міжнароднымі арганізацыямі, зацікаўленымі ва ўстанаўленні ўзаемадзеяння з Садружнасцю па напрамках, якія ўяўляюць узаемны інтарэс.

У ліку дакументаў, прынятых па выніках саміту, - Дэкларацыя аб супрацоўніцтве ў сферы забеспячэння рэгіянальнай энергетычнай бяспекі. Дакумент з'яўляецца стратэгічнай асновай для развіцця ўзаемаадносін паміж дзяржавамі па забеспячэнні рэгіянальнай энергетычнай бяспекі.

Акрамя таго, на саміце зацверджаны Канцэпцыя ваеннага супрацоўніцтва дзяржаў СНД да 2030 года, праграма супрацоўніцтва дзяржаў Садружнасці ва ўмацаванні пагранічнай бяспекі на знешніх граніцах на 2026-2030 гады, праграма супрацоўніцтва ў сферы процідзеяння тэрарызму і экстрэмізму і шэраг іншых дакументаў.

Сярод іншых рашэнняў і заяў, прынятых па выніках саміту, - сумесныя заявы ў гонар 80-й гадавіны стварэння ААН і ў сувязі з 40-гадавінай аварыі на Чарнобыльскай АЭС.

Рашэннем лідараў краін Садружнасці Сяргей Лебедзеў назначаны генеральным сакратаром СНД на наступныя тры гады.

Кіраўнікі дзяржаў таксама прынялі рашэнні аб спыненні шэрага шматбаковых дагавораў, заключаных у рамках СНД.

версія для друку

зрабіць стартавай

дабавіць у выбранае