Падзеі

"Якія ў вас там палюбоўнікі і палюбоўніцы?" Лукашэнка аб схемах з арэндай у прыватнікаў дарожнай тэхнікі

6 лістапада, Мазыр /Кар. БЕЛТА/. Прэзідэнт Беларусі Аляксандр Лукашэнка папярэдзіў аб недапушчальнасці карупцыі ў цэлым і ў дарожна-будаўнічай галіне ў прыватнасці, дзе выкрыты падазроныя схемы з арэндай тэхнікі. Аб гэтым кіраўнік дзяржавы заявіў у Мазыры на цырымоніі адкрыцця абноўленага моста цераз Прыпяць, перадае карэспандэнт БЕЛТА.

"Крадуць. Гэтыя таксама крадуць (у дарожна-будаўнічай галіне. - Заўвага БЕЛТА). Вось мы цяпер выкрылі - Камітэт дзяржкантролю цяпер працуе. Што робяць? У нас ёсць прыватныя прадпрыемствы, у якіх ёсць тэхніка. Асфальтаўкладчыкі, каткі, пагрузчыкі, экскаватары. Вашы начальнікі (дарожна-будаўнічых арганізацый. - Заўвага БЕЛТА) арандуюць гэту тэхнку. А навошта? У тры-пяць разоў даражэйшую. Адразу насцярожвае, - сказаў кіраўнік дзяржавы. - А каму вы плаціце? Якія ў вас там палюбоўнікі, палюбоўніцы і іншыя, якім вы грошы даяце?! Ну калі хочаце палюбоўніцу, вы тады са сваёй кішэні плаціце. Што ж у дарогу загналі - у сабекошт (эканамісты разумеюць). І я плачу за гэта грошы (бюджэтныя. - Заўвага БЕЛТА). Чаму я павінен утрымліваць? Гэта нікуды не варта".

"Таму будзе вельмі жорсткае спагнанне. Я заўсёды гаварыў, і гамяльчане (жыхары Гомельскай вобласці. - Заўвага БЕЛТА) мяне падтрымлівалі: карупцыя - гэта ржа, якая раз'ядае любую эканоміку", - падкрэсліў беларускі лідар.

"Ты чаго гэту тэхніку арандуеш, у пяць разоў даражэй плаціш? Ды ты, пабудаваўшы гэты мост, мог бы зарабіць грошы і купіць асфальтаўкладчык або каток, экскаватар або пагрузчык. Ты не зрабіў. Чаму? Рыхтуйцеся", - папярэдзіў Аляксандр Лукашэнка.

Заслухоўваючы даклад аб перспектывах дарожнага будаўніцтва, Прэзідэнт падкрэсліў, што даручыў старшыні КДК у гэтым пытанні вельмі сур'ёзна ўзварухнуць галіну. "Жудасныя рэчы адбываюцца, - сказаў ён. - Прыватнік аддае тэхніку ў арэнду ўтрая даражэй. Гэта што такое? Гэта - карупцыя".

Як паведамлялася БЕЛТА, напярэдадні гэта тэма гучала ў ходзе даклада кіраўніку дзяржавы старшыні Камітэта дзяржкантролю Васіля Герасімава. "На жаль, холдынг "Белаўтадар" не ідзе на нармальнае абнаўленне тэхнікі, а пачаў актыўна выкарыстоўваць арэнду гэтай тэхнікі ў прыватных арганізацый. З 2023 года на гэта было патрачана Br25 млн. Кошт гэтай арэнды такі, што за два гады прыватныя арганізацыі ў некалькі разоў акупляюць тэхніку. Зразумела, гэта недапушчальна. І холдынгу неабходна думаць, што рабіць далей", - заявіў кіраўнік КДК.

версія для друку

зрабіць стартавай

дабавіць у выбранае