Падзеі

"Гэта не кармушка". Лукашэнка запатрабаваў ад вучоных перастаць выконваць незапатрабаваныя даследаванні

21 лістапада, Мінск /Кар. БЕЛТА/. Прэзідэнт Беларусі Аляксандр Лукашэнка запатрабаваў ад вучоных перастаць выконваць незапатрабаваныя даследаванні і ствараць бесперспектыўную прадукцыю. Аб гэтым кіраўнік дзяржавы заявіў на нарадзе па пытаннях развіцця навуковай сферы і дзейнасці НАН, перадае карэспандэнт БЕЛТА.

Гаворачы аб недахопах у рабоце вучоных, Аляксандр Лукашэнка звярнуў увагу на праблему тэматычнага дубліравання і драбнатэмнасці ў навукова-тэхнічных праграмах.

"Можа, прагучыць груба, дзяржпраграмы - гэта не кармушка! Галоўная задача, перш за ўсё для ДКНТ, - перастаньце выконваць незапатрабаваныя даследаванні і ствараць бесперспектыўную прадукцыю! - запатрабаваў Прэзідэнт. - Тады пытанне з абаронай дысертацый само адпадзе. Кожнае заданне ў навукова-тэхнічных праграмах - гэта тэма дысертацыі. Выканаў заданне - атрымай навуковую ступень". Яшчэ адна важная ўмова - напаўненне праграм такімі заданнямі, якія паказваюць вынік не ў далёкай перспектыве, а цяпер. Акрамя таго, трэба нарэшце вызначыцца з тым, хто выступае заказчыкамі гэтых праграм.

"Як я ўжо заяўляў, плаціць будзем за вынік!" - падкрэсліў кіраўнік дзяржавы.

Ён нагадаў, што адказнасць за эфектыўнае выкарыстанне сродкаў у поўнай меры ляжыць на ДКНТ, які выконвае функцыі Камітэта дзяржкантролю ў навуцы. "У наступным праграмным цыкле ваша задача - правесці жорсткую, але аб'ектыўную экспертызу заданняў, арганізаваць работу, нацэленую на вынік, а не на распыленне дзяржаўных сродкаў", - запатрабаваў Прэзідэнт.

Ён даручыў перамясціць прыярытэт на тэхналогіі, якія працуюць на ўсю эканоміку, на так званыя скразныя тэхналогіі. "Ні для каго не сакрэт, што менавіта яны даюць магчымасць краіне заставацца ў авангардзе глабальнай гонкі і пазбягаць тэхналагічнага адставання", - заўважыў беларускі лідар.

"Трэба ствараць умовы, пры якіх інвестыцыі ў гэтыя базавыя тэхналогіі прынясуць максімальны эфект для ўсёй эканомікі", - арыентаваў кіраўнік дзяржавы.

У сувязі з гэтым Аляксандр Лукашэнка прапанаваў прапрацаваць механізм, калі вучоны-распрацоўшчык бярэ на сябе камерцыялізацыю вынікаў навукова-даследчых работ, а потым з прыбытку выплачвае дзяржаве ўсе зрасходаваныя бюджэтныя сродкі або іх частку. "Вы падумайце над гэтым механізмам. У рыначнай эканоміцы жывём", - заўважыў Прэзідэнт. Пры гэтым ён перасцярог ад негатыўных прыкладаў, якія ёсць цяпер. Напрыклад, калі за некаторыя распрацоўкі, якія выконваюцца для заказчыкаў з-за мяжы, узнагароджанне атрымлівае канкрэтны чалавек у Беларусі - кіраўнік групы або вучоны. Хоць адукацыю гэты чалавек атрымаў у Беларусі, выкарыстоўваў для выканання распрацоўкі айчыннае абсталяванне і лабараторыі. "Мы гэта бачым. Усё, мужыкі, дурніца скончылася. Пачуйце мяне. Я не супраць, каб вы зараблялі. Але не такім чынам - не за кошт чужой працы, абсталявання і іншага, - звярнуў увагу Аляксандр Лукашэнка. - Да з'езда вучоных вы гэта выкараніце".

У той жа час Прэзідэнт даручыў прадумаць, як можна заахвоціць, заплаціць тым, хто сапраўды сумленна працуе, выконваючы замежныя заказы, і прыцягвае ў краіну валюту. "Падумайце, як мы заплаціць за гэта павінны. І шкадаваць грошай не трэба на гэта", - сказаў кіраўнік дзяржавы.

версія для друку

зрабіць стартавай

дабавіць у выбранае