Падзеі

Галоўчанка: старшынства Беларусі ў ЕАЭС накіравана на ўмацаванне па ўсіх напрамках інтэграцыі

30 студзеня, Алматы /Кар. БЕЛТА/. Беларускае старшынства ў ЕАЭС у гэтым годзе будзе накіравана на ўмацаванне сумеснай работы на ўсіх напрамках інтэграцыйнай дзейнасці. Аб гэтым заявіў прэм'ер-міністр Беларусі Раман Галоўчанка ў час пасяджэння Еўразійскага міжурадавага савета ў вузкім складзе, паведамляе карэспандэнт БЕЛТА.

Беларусь з 1 студзеня пачала выкананне сваіх абавязкаў па старшынстве ў органах ЕАЭС. Мэты і задачы гэтага старшынства выкладзены ў звароце Прэзідэнта Рэспублікі Беларусь кіраўнікам дзяржаў - членаў ЕАЭС.

Раман Галоўчанка адзначыў, што старшынства Беларусі ў гэтым годзе будзе накіравана на ўмацаванне сумеснай работы на ўсіх напрамках інтэграцыйнай дзейнасці.

"Асаблівую ўвагу мы традыцыйна пастараемся ўдзяліць пытанням фарміравання агульнай кааперацыйнай прамысловай прасторы, рэалізацыі сумесных праектаў па прынятых ужо рашэннях у сферы падтрымкі праектаў у галіне прамысловасці, АПК, прыкласці дадатковыя намаганні на такім важным у сучасных умовах напрамку, як лічбавая трансфармацыя эканомікі", - адзначыў прэм'ер-міністр.

Неабходна прадоўжыць актыўнае міжнароднае супрацоўніцтва ЕАЭС з акцэнтам на пашырэнні эфектыўна дзеючай сеткі прэферэнцыяльных гандлёвых пагадненняў, дадаў Раман Галоўчанка.

"У мэтах міжнароднага пазіцыянавання саюза мы падтрымліваем ініцыятыву аб правядзенні Дзён ЕАЭС у штаб-кватэры ААН у Жэневе ў рамках Рэгіянальнага форуму ЕЭК ААН па ўстойлівым развіцці ў красавіку бягучага года", - сказаў прэм'ер-міністр.

Мэтазгодным у гэтым годзе бачыцца прадставіць на палітычным форуме высокага ўзроўню па ўстойлівым развіцці, які штогод праводзіцца ў Штаб-кватэры ААН у Нью-Ёрку, даклад аб дасягненні Мэт устойлівага развіцця ў ЕАЭС. "Папярэдні даклад на гэтай пляцоўцы рабіўся камісіяй у 2017 годзе. Я ўпэўнены, што за мінулы перыяд нам ёсць чым падзяліцца з сусветнай супольнасцю", - падкрэсліў Раман Галоўчанка.

Паводле яго слоў, парадак дня сённяшняга пасяджэння ўключае шэраг значных пытанняў, якія трэба будзе абмеркаваць у вузкім складзе і прыняць па іх рашэнні. Прэм'ер-міністр выказаў упэўненасць, што ўдасца знайсці ўзаемапрымальныя рашэнні па ўсіх гэтых пытаннях.

версія для друку

зрабіць стартавай

дабавіць у выбранае