Падзеі

Галоўчанка перадаў Лукашэнку першую залатую манету з беларускай сыравіны

12 жніўня, Мінск /Кар. БЕЛТА/. Першую залатую манету адчаканілі ў Беларусі. Аб гэтым старшыня праўлення Нацыянальнага банка Раман Галоўчанка заявіў на дакладзе ў кіраўніка дзяржавы аб развіцці банкаўскай сістэмы, перадае карэспандэнт БЕЛТА.

"Хацеў бы пачаць, можа, з такога невялікага сімвалічнага моманту..." - пачаў даклад Раман Галоўчанка.

"Грошы прынёс?" - жартам заўважыў Аляксандр Лукашэнка.

"Я ва ўрадзе актыўна займаўся імпартазамяшчэннем і тут вырашыў прадоўжыць гэту тэматыку. Усім вядома, што Нацыянальны банк актыўна выпускае ў абарачэнне памятныя і інвестыцыйныя манеты, у тым ліку з каштоўных металаў. Для мяне было сюрпрызам даведацца, што ўсе яны выпускаліся за мяжой. Па заказе Нацыянальнага банка, але за мяжой. Спачатку ў Еўрасаюзе, потым у дружалюбных краінах: Кітай, Расія, Казахстан", - сказаў Раман Галоўчанка.

Паводле слоў старшыні праўлення Нацбанка, пры выпуску ў іншых краінах манет з серабра або золата там жа даводзіцца купляць і метал: "Пры гэтым наша сыравіна - лом каштоўных металаў - застаецца незапатрабаванай. Таму мы з міністрам фінансаў падумалі: чаму самі не можам зрабіць?"

Раман Галоўчанка звярнуў увагу, што гомельскае прадпрыемства "Крышталь", што працуе з каштоўнымі металамі, крыху дааснасцілі і адчаканілі першую залатую манету, якая называецца "Славянка". Старшыня праўлення Нацбанка перадаў яе Прэзідэнту Беларусі. "Поўнасцю зроблена ў Беларусі з беларускай сыравіны, калі можна так сказаць", - дадаў ён.

Аляксандр Лукашэнка даручыў перадаць першую манету з беларускай сыравіны ў музей Палаца Незалежнасці. "Першая манета ўсё ж такі - гэта вельмі важна і прынцыпова. І ў новы музей (размова пра ўзводзімы Нацыянальны гістарычны музей. - Заўвага БЕЛТА) потым перададзім", - запэўніў беларускі лідар.

версія для друку

зрабіць стартавай

дабавіць у выбранае