Падзеі

"Думайце і не крыўдуйце потым на дзяржаву". Лукашэнка выказаўся пра размеркаванне спецыялістаў

19 снежня, Мінск /Кар. БЕЛТА/. Прэзідэнт Беларусі Аляксандр Лукашэнка, Старшыня VII Усебеларускага народнага сходу (УНС) на пасяджэнні УНС выказаўся на тэму размеркавання спецыялістаў, перадае карэспандэнт БЕЛТА.

"Думайце і не крыўдуйце потым на дзяржаву. Чаму вы пазбаўляеце мяне (ад імя дзяржавы. - Заўвага БЕЛТА) права падрыхтаваць студэнтаў, спецыялістаў і накіраваць іх туды, куды мне гэта патрэбна?" - задаў рытарычнае пытанне Прэзідэнт.

Ён адзначыў, што і ён, і большасць дэлегатаў УНС у свой час накіроўваліся па размеркаванні пасля атрымання адукацыі ў навучальных установах. "І там змагайцеся, працуйце, выходзьце наверх, калі ў вас будуць амбіцыі і жаданне. Будзем вас падтрымліваць", - запэўніў кіраўнік дзяржавы.

Аляксандр Лукашэнка заявіў, што і далей у Беларусі будуць размяркоўваць студэнтаў, якія скончылі ВНУ. "Каб не трапіць у лік тых, хто размяркоўваецца, вы думайце, перш чым паступаць у ВНУ", - сказаў ён. Яшчэ адзін варыянт - вучыцца платна, як гэта робяць замежныя студэнты.

Прэзідэнт даў параду маладым людзям, якія заканчваюць сярэднюю школу, і асабліва іх бацькам: "Перш чым прымаць рашэнне ісці ў тую ці іншую ВНУ, трэба разумець, каго гэта ВНУ рыхтуе і для чаго. Калі вам не падабаецца, што вы будзеце размеркаваны туды, куды трэба ўласніку прадпрыемства (гаворка ў тым ліку пра мэтавую падрыхтоўку. - Заўвага БЕЛТА), вы туды не хадзіце, вы загадзя павінны вызначыцца".

Кіраўнік дзяржавы адзначыў, што ў Беларусі ВНУ рыхтуюць спецыялістаў перш за ўсё для патрэб краіны. Няважна, дзяржаўныя яны ці прыватныя. Што датычыцца прыватных, Прэзідэнт нагадаў, што ў гэтай сферы засталіся працаваць толькі тыя, хто вытрымаў канкурэнцыю, бо ў 1990-я гады "яны выраслі як грыбы". "І кот, і сабака, і пацук маглі атрымаць адукацыю. А тое і не наведваць, а проста купіць (дыплом. - Заўвага БЕЛТА)", - заўважыў беларускі лідар.

"Было пастаўлена пытанне. Прыватныя ВНУ душыць не будзем. Але калі яны вытрымаюць канкурэнцыю з дзяржаўнымі. Крытыкаваў хто толькі мог. Але мы гэта вытрымалі і сёння пераканаліся, што мы мелі рацыю. ВНУ дзяржаўныя, выкладчыкі і калектывы ствараліся гадамі", - сказаў Аляксандр Лукашэнка.

версія для друку

зрабіць стартавай

дабавіць у выбранае