Падзеі

4 красавіка, Мінск /Кар. БЕЛТА/. Чарговы раўнд перагавораў па ўрэгуляванні сітуацыі на ўсходзе Украіны пачаўся ў Мінску, паведамілі БЕЛТА ў Міністэрстве замежных спраў Беларусі.

"У Мінску праходзіць сустрэча рабочых падгруп трохбаковай кантактнай групы па ўрэгуляванні сітуацыі на ўсходзе Украіны", - праінфармавалі ў МЗС. Затым перагаворы пачне сама ТКГ.

Папярэдні раз кантактная група збіралася 14 сакавіка. Яна адзначала істотнае скарачэнне колькасці парушэнняў рэжыму спынення агню і значнае змяншэнне колькасці ахвяр сярод грамадзянскага насельніцтва. Адной з галоўных тэм пасяджэння эканамічнай рабочай групы чарговы раз стала пытанне мабільнай сувязі Vodafone-Ukraine. Пры ўдзеле прадстаўніка кампаніі рабочая група прадоўжыла абмеркаванне неабходных практычных крокаў для аднаўлення і забеспячэння сувязі на тэрыторыі асобных раёнаў Данецкай і Луганскай абласцей (АРДВ і АРЛВ). Акрамя таго, рабочая група прадоўжыла разгляд пытанняў водазабеспячэння ў сістэмах "Карбаніт" і "Вада Данбаса", пагашэння запазычанасцей былым супрацоўнікам Украінскай чыгункі ў АРДВ і АРЛВ, а таксама вяртання чыгуначных вагонаў, якія знаходзяцца цяпер на непадкантрольнай ураду Украіны тэрыторыі. Рабочая група па гуманітарных пытаннях абмеркавала тэму абмену ўтрымліваемымі. Удзельнікі палітычнай групы абмяняліся меркаваннямі наконт будучай імплементацыі так званай формулы Штайнмаера, амністыі, мясцовых выбараў і забеспячэння асаблівага статусу АРДВ і АРЛВ згодна з мінскімі пагадненнямі.