Афіцыйны сайт Рэспублікі Беларусь
Улада
Каляндар падзей у Беларусі
Выдатныя мясціны Беларусі
Сусветная спадчына ЮНЕСКА ў Беларусі
Беларускія санаторыі і курорты
Сувеніры з Беларусі
| Галоўная | Улада | Падзеі

Падзеі

2 Jun 2015

Беларусы змогуць наведваць В'етнам без віз пры кароткатэрміновых паездках

2 чэрвеня, Мінск /Аліна Грышкевіч - БЕЛТА/. В'етнам спрашчае візавы рэжым для грамадзян Беларусі, паведамілі БЕЛТА ў прэс-службе беларускага МЗС са спасылкай на рашэнне в'етнамскага ўрада.

"З 1 ліпеня 2015 года грамадзяне Рэспублікі Беларусь, якія прыбываюць у В'етнам на тэрмін да 15 дзён, вызвалены ад неабходнасці атрымання віз, незалежна ад тыпу пашпарта і мэты візіту. Бязвізавы рэжым уезду пры кароткатэрміновых паездках беларускіх грамадзян устанаўліваецца на 5 гадоў, па 30 чэрвеня 2020 года. Пры гэтым заканадаўства В'етнама прадугледжвае магчымасць далейшага прадаўжэння гэтага рашэння", - адзначылі ў прэс-службе.

Абмеркаванне магчымасці спрашчэння візавага рэжыму вялося бакамі некалькі апошніх гадоў паралельна з перагаворамі аб падпісанні Пагаднення аб свабодным гандлі. "Разумеючы, што развіццё гандлёва-эканамічных адносін у рамках ствараемай зоны свабоднага гандлю будзе цяжкадасягальным без узаемнага аблягчэння перамяшчэння прадстаўнікоў дзелавых колаў, яшчэ ў снежні 2014 года беларускі бок у аднабаковым парадку спрасціў працэдуру атрымання ўязных віз грамадзянамі В'етнама, - паведамілі ў МЗС. - Пытанне аб кроку ў адказ узнімалася на сустрэчы прэм'ер-міністра Беларусі Андрэя Кабякова з прэм'ер-міністрам В'етнама Нгуен Тан Зунгам у маі 2015 года ў Казахстане непасрэдна ў рамках падпісання Пагаднення аб свабодным гандлі паміж дзяржавамі - членамі Еўразійскага эканамічнага саюза і Сацыялістычнай Рэспублікай В'етнам".

Беларускі бок высока ацэньвае такое аператыўнае прыняцце ўрадам В'етнама адпаведнага рашэння, дзякуючы якому ўжо з 1 ліпеня бягучага года пры кароткатэрміновых паездках грамадзян Беларусі ў В'етнам візы не спатрэбяцца. Прынятыя Беларуссю і В'етнамам рашэнні па аблягчэнні ўзаемных паездак грамадзян поўнасцю адпавядаюць інтарэсам дзвюх краін, паколькі будуць садзейнічаць актывізацыі дзелавых кантактаў і партнёрскіх сувязей, упэўнены ў Міністэрстве замежных спраў.

У каментарыі прэс-службы МЗС таксама гаворыцца: "Той факт, што Беларусь з'яўляецца адной з нямногіх краін, адносна грамадзян якой урадам В'етнама прынята рашэнне аб аднабаковым прымяненні бязвізавага рэжыму пры паездках да 15 дзён, і першай краінай, якая атрымала такую прывілею ў адпаведнасці з новым в'етнамскім заканадаўствам, яшчэ раз пацвярджае дружалюбныя адносіны паміж Беларуссю і В'етнамам".

Патрабаванне аб наяўнасці візы пры ўездзе ў В'етнам па любых падставах на тэрмін да 15 дзён адменена ў аднабаковым парадку па рашэнні ўрада В'етнама для грамадзян Рэспублікі Карэя, Японіі (2004 год), Даніі, Швецыі, Нарвегіі, Фінляндыі (2005 год), Расійскай Федэрацыі (2009 год). Такія рашэнні прымаліся ў якасці эксперымента, аднак з 1 студзеня гэтага года паўнамоцтвы ўрада В'етнама на прыняцце рашэнняў аб аднабаковым увядзенні В'етнамам бязвізавага рэжыму адносна грамадзян іншай краіны былі замацаваны на заканадаўчым узроўні.

Архіў
Пн Аўт Сер Чцв Пт Сб Нядз
Помнікі Вялікай Айчыннай вайны ў Беларусі