Афіцыйны сайт Рэспублікі Беларусь
Улада
Каляндар падзей у Беларусі
Выдатныя мясціны Беларусі
Сусветная спадчына ЮНЕСКА ў Беларусі
Беларускія санаторыі і курорты
Сувеніры з Беларусі
| Галоўная | Улада | Падзеі

Падзеі

18 Jun 2018

Беларускія дэпутаты маюць намер выкарыстоўваць аналітычны інструментарый СБ

18 чэрвеня, Мінск /Кар. БЕЛТА/. Беларускія дэпутаты будуць выкарыстоўваць аналітычны інструментарый Групы Сусветнага банка ў нарматворчай дзейнасці. Аб гэтым заявіў сёння журналістам старшыня Пастаяннай камісіі Палаты прадстаўнікоў па эканамічнай палітыцы Уладзіслаў Шчэпаў перад пачаткам сустрэчы дэпутатаў з кіраўніком прадстаўніцтва Сусветнага банка ў Беларусі Алексам Крэмерам, перадае карэспандэнт БЕЛТА.

"Сённяшняя сустрэча праходзіць па ініцыятыве Сусветнага банка. Мы ўжо неаднаразова сустракаліся з імі раней і ставім сёння сабе дзве мэты. Першая - гэта выкарыстанне аналітычнага інструментарыю і патэнцыялу Групы Сусветнага банка ў нарматворчай дзейнасці. Цяпер фарміруецца бюджэт краіны на 2019 год і на перыяд да 2021 года, акрамя таго, у нас у планах ёсць шэраг законапраектаў, звязаных з дзейнасцю Сусветнага банка ў сацыяльнай сферы, адукацыі, напрыклад, Кодэкс аб адукацыі, які абмяркоўваецца ў Палаце прадстаўнікоў. І нас цікавяць тыя навелы, якія прапануюцца Сусветным банкам", - падкрэсліў Уладзіслаў Шчэпаў.

Ён таксама адзначыў, што супрацоўніцтва з Сусветным банкам вельмі важна для профільнай камісіі па эканамічнай палітыцы. "Комплекснае даследаванне, праведзенае Сусветным банкам, з'яўляецца фундаментальнай работай, дзе мы бачым экспертную ацэнку тых тэндэнцый, якія адбываюцца ў нашай краіне ў макраэканоміцы, банкаўскім сектары, у галіне эфектыўнасці кіравання інвестыцыямі і дзяржаўнымі прадпрыемствамі. Тут, думаю, мы знойдзем агульныя інтарэсы і нават распрацуем план агульнай дзейнасці, агульных мерапрыемстваў. Тым больш у бліжэйшы час мы будзем абмяркоўваць заканадаўства ў галіне інвестыцый і прыватызацыі і запросім прадстаўнікоў Групы Сусветнага банка для правядзення сумесных мерапрыемстваў", - растлумачыў старшыня камісіі.

Алекс Крэмер таксама адзначыў важнасць такіх сустрэч з дэпутацкім корпусам Беларусі. "Група Сусветнага банка пачынае цяпер рэалізацыю пяцігадовай рамачнай стратэгіі партнёрства для Беларусі, якая была зацверджана ў красавіку. І мэта сённяшняга пасяджэння - вызначыць, якім чынам уся тая аналітычная работа, што праводзіць Група Сусветнага банка ў галіне макраэканомікі і інвестыцый, можа быць карыснай дэпутатам. Гэта вельмі важна для нас, таму што мы спадзяёмся на магчымасць прыцягнення максімальна вялікай колькасці розных устаноў, агенцтваў і арганізацый у дыялог па выпрацоўцы эканамічнай палітыкі Беларусі", - заявіў ён.

Кіраўнік прадстаўніцтва Сусветнага банка нагадаў, што згодна з новай стратэгіяй банк выдзеліць Беларусі фінансаванне ў аб'ёме $570 млн, таксама плануецца дадатковае фінансаванне, якое патэнцыяльна можа быць выдзелена Міжнароднай фінансавай карпарацыяй у аб'ёме каля $120 млн. "Што датычыцца новых напрамкаў нашага супрацоўніцтва, то можна вылучыць дзве найбольш цікавыя тэмы, над якімі мы будзем сумесна працаваць. Першая - мы будзем больш глыбока ўдзельнічаць у дыялогу з беларускімі органамі дзяржкіравання адносна тых структурных эканамічных пераўтварэнняў, якія неабходны краіне. Другая - мы будзем падтрымліваць работу па мадэрнізацыі сектара вышэйшай адукацыі Беларусі", - расказаў ён.

Паводле слоў Алекса Крэмера, праект па мадэрнізацыі вышэйшай адукацыі неабходны для таго, каб моладзь у Беларусі магла выпускацца з універсітэтаў, валодаючы тымі сучаснымі навыкамі, якія максімальна адпавядаюць патрэбнасцям рынку працы. "І нас сапраўды вельмі цікавяць тыя ідэі, якія ёсць ва ўрада для таго, каб мець магчымасць прывядзення вучэбных планаў і адукацыйных праграм, што выкарыстоўваюцца ва ўніверсітэтах, у адпаведнасць з лепшымі сусветнымі практыкамі", - сказаў ён. Кіраўнік прадстаўніцтва СБ удакладніў, што праект пакуль у стадыі распрацоўкі, і канкрэтнага пераліку ўніверсітэтаў, якія будуць у ім удзельнічаць, няма.

Архіў
Пн Аўт Сер Чцв Пт Сб Нядз
Помнікі Вялікай Айчыннай вайны ў Беларусі