Падзеі
Беларуская дэлегацыя правяла ў Кампале перагаворы з калегамі з Уганды, Ірана і Індыі
Фота з архiва
17 кастрычніка, Мінск /Кар. БЕЛТА/. Ва Угандзе на 19-й міністэрскай сустрэчы Руху недалучэння, у якой удзельнічаў міністр замежных спраў Рэспублікі Беларусь Максім Рыжанкоў, прыняты падагульняючы дакумент з пацвярджэннем прыхільнасці краін-удзельніц прынцыпам раўнапраўнага супрацоўніцтва. Аб гэтым паведамляе БЕЛТА са спасылкай на МЗС.
У дакуменце размова ідзе пра паважанне суверэнітэту дзяржаў, мірнае ўрэгуляванне міжнародных канфліктаў і ўмацаванне глабальнай стабільнасці. У ім адзначана таксама важнасць актывізацыі палітычнага дыялогу, пашырэння эканамічных і гуманітарных сувязей паміж краінамі - членамі Руху недалучэння і сумесных намаганняў па дасягненні ўстойлівага развіцця. Дзяржавы-члены аднагалосна выступілі супраць прымянення аднабаковых прымусовых мер. У дакуменце знайшлі сваё адлюстраванне беларускія ініцыятывы па барацьбе з гандлем людзьмі, прызнанні разнастайнасці шляхоў прагрэсіўнага развіцця, абароне інтарэсаў краін з сярэднім узроўнем даходу.
У рамках візіту ў Кампалу (Уганда) кіраўнік беларускага МЗС правёў шэраг двухбаковых сустрэч з прадстаўнікамі ўрада Рэспублікі Уганда і калегамі з краін РН. Сустрэча з віцэ-прэзідэнтам Рэспублікі Уганда Джэсікай Роўз Алупа была прысвечана далейшай выпрацоўцы дарожнай карты двухбаковага супрацоўніцтва і напаўненню яе канкрэтнымі задачамі ў галіне сельскай гаспадаркі, стварэнню сумесных прадпрыемстваў на тэрыторыі Уганды па вытворчасці трактароў і сельгастэхнікі, будаўніцтву інфраструктуры, а таксама сувязям у галіне лёгкай прамысловасці. Дасягнута дамоўленасць аб хуткім візіце ўгандыйскай дэлегацыі ў Беларусь на чале з віцэ-прэзідэнтам. Бакі выказалі прыхільнасць да далейшага выбудоўвання доўгатэрміновага і стратэгічнага ўзаемадзеяння і дамовіліся правесці ў бліжэйшы час пасяджэнне міжурадавай камісіі па гандлёва-эканамічным супрацоўніцтве.
На перагаворах з дзяржаўным міністрам па пытаннях жывёлагадоўлі Міністэрства сельскай гаспадаркі, жывёлагадоўлі і рыбалоўства Рэспублікі Уганда Брайтам Рвамірамам быў абмеркаваны ход рэалізацыі дамоўленасцей па выніках яго нядаўняга візіту ў Беларусь. Бакі дамовіліся паскорыць работу над выкананнем пунктаў мемарандума аб узаемаразуменні ў сферы гарантавання харчовай бяспекі. У прыватнасці, дамовіліся выкарыстоўваць беларускія тэхналогіі для далейшай механізацыі сельскай гаспадаркі Уганды, у тым ліку для захавання малака і атрымання сухога малака. Акрамя таго, абмеркаваны магчымасці паставак беларускага халадзільнага і даільнага абсталявання, стварэння сумесных зборачных вытворчасцей сельгастэхнікі на тэрыторыі Уганды.
У фокусе ўвагі перагавораў кіраўніка МЗС Беларусі з міністрам замежных спраў Ірана Абасам Аракчы былі пытанні далейшай інтэнсіфікацыі палітычных кантактаў, гандлёва-эканамічнага ўзаемадзеяння і супрацоўніцтва на пляцоўках міжнародных арганізацый. Іранскі бок прапанаваў канкрэтныя тэрміны правядзення міжурадавай камісіі па гандлёва-эканамічным супрацоўніцтве ў Мінску. Іранскі міністр замежных спраў пацвердзіў гатоўнасць ажыццяўлення свайго візіту ў Беларусь у бліжэйшы час. Бакі таксама абмеркавалі графік узаемных візітаў на вышэйшым узроўні. Іранскі бок таксама пацвердзіў гатоўнасць прыняць дэлегацыю Міністэрства транспарту і камунікацый Рэспублікі Беларусь для вывучэння перспектыў узаемадзеяння ў галіне міжнароднай лагістыкі і транспартнай інфраструктуры. Іранскі бок падтрымаў ініцыятыву Беларусі ў галіне еўразійскай бяспекі і пацвердзіў свой удзел у ІІІ Мінскай міжнароднай канферэнцыі па Еўразійскай бяспецы.
На сустрэчы з дзяржаўным міністрам замежных спраў Індыі Кірці Вардханам Сінгхам быў адзначаны высокі ўзровень даверу ва ўзаемадзеянні дзвюх краін. Бакі абмеркавалі арганізацыю візітаў на вышэйшым і высокім узроўні, у тым ліку ў рамках мерапрыемстваў рэгіянальных аб'яднанняў, а таксама тэмы пашырэння гандлёва-эканамічнага і інвестыцыйнага ўзаемадзеяння, у прыватнасці, правядзенне ў Мінску да канца года пасяджэння міжурадавай камісіі па гандлёва-эканамічным супрацоўніцтве, рэалізацыі сумесных праектаў у прамысловай, навукова-тэхнічнай і адукацыйнай сферах. Была дасягнута дамоўленасць аб распрацоўцы сумеснай дарожнай карты па ўсіх напрамках двухбаковага супрацоўніцтва, якія маюць узаемную цікавасць. Акрамя таго, адзначана неабходнасць актывізацыі работы па ўдасканаленні дагаворна-прававой базы. Індыя таксама пацвердзіла свой удзел у ІІІ Мінскай міжнароднай канферэнцыі па еўразійскай бяспецы.
версія для друку
зрабіць стартавай
дабавіць у выбранае