Падзеі

Беларусь заклікала краіны ШАС аб'яднаць намаганні, каб спыніць спаўзанне свету ў бездань поўнамаштабнай вайны

Фота з архiва

24 красавіка, Мінск /Кар. БЕЛТА/. Чарговы раўнд кансультацый па пытаннях міжнароднай дзейнасці Шанхайскай арганізацыі супрацоўніцтва (ШАС) і рэгіянальнай бяспекі на ўзроўні намеснікаў міністраў замежных спраў дзяржаў - членаў ШАС 24 красавіка адбыўся ў Маскве, паведамляе карэспандэнт БЕЛТА са спасылкай на беларускае МЗС. 

Беларускую дэлегацыю на мерапрыемстве ўзначаліў першы намеснік міністра замежных спраў Беларусі Сяргей Лукашэвіч. Кансультацыі былі накіраваны на паглыбленне знешнепалітычнай каардынацыі дзяржаў - членаў ШАС з мэтай узмацнення міжнародных пазіцый Арганізацыі.

Асаблівая ўвага была ўдзелена ролі ШАС у фарміраванні архітэктуры роўнай і непадзельнай бяспекі ў Еўразіі ў кантэксце бягучых выклікаў у рэгіёне, удасканаленню механізмаў аператыўнага рэагавання ў рамках Арганізацыі.

У сваім выступленні першы намеснік міністра, у прыватнасці, адзначыў: "У Рэспубліцы Беларусь з глыбокай трывогай сочаць за развіццём сітуацыі ў Персідскім Заліве. Зыходзім з таго, што агрэсія супраць суверэнных і незалежных дзяржаў недапушчальна. Асаблівую небяспеку ў гэтым канфлікце выклікаюць удары па аб'ектах грамадзянскай, прамысловай і энергетычнай інфраструктуры. Ніякія мэты не могуць апраўдаць пагарджання да чалавечага жыцця. Гуманітарныя наступствы ўжо набылі катастрафічны характар. Падкрэсліваем безумоўную неабходнасць абароны мірнага насельніцтва ў адпаведнасці з Жэнеўскімі канвенцыямі".

Сяргей Лукашэвіч таксама адзначыў: "Трывогу выклікае нанясенне ўдараў па аб'ектах мірнай ядзернай інфраструктуры Ірана, уключаючы раён АЭС "Бушэр". Любое пашкоджанне такіх аб'ектаў тоіць у сабе не проста лакальную катастрофу, але і рызыку некантралюемага радыеактыўнага заражэння, якое не прызнае дзяржаўных граніц. Адзіным выхадам застаецца вяртанне ў рэчышча палітыка-дыпламатычнага ўрэгулявання".

"У цяперашніх умовах неабходна аб'яднаць намаганні, каб спыніць спаўзанне рэгіёна і свету ў бездань поўнамаштабнай вайны з катастрафічнымі доўгатэрміновымі і непрадказальнымі наступствамі", - выказаў меркаванне першы намеснік міністра замежных спраў Беларусі.

версія для друку

зрабіць стартавай

дабавіць у выбранае