Падзеі

Беларусь прадставіла ў ААН абноўленую рэзалюцыю па барацьбе з гандлем людзьмі

Фота з архiва

19 лістапада, Мінск /Кар. БЕЛТА/. Беларусь прадставіла ў ААН праект рэзалюцыі "Паляпшэнне каардынацыі намаганняў па барацьбе з гандлем людзьмі". Дакумент быў разгледжаны на пасяджэнні Трэцяга камітэта Генеральнай Асамблеі ААН у Нью-Ёрку, паведамляе БЕЛТА.

Суаўтарамі праекта рэзалюцыі выступіла каля чатырох дзясяткаў краін, у іх ліку Венесуэла, В'етнам, Катар, Казахстан, Кітай, КНДР, Лаос, Нікарагуа, Расія, Таджыкістан, Узбекістан.

Рэзалюцыі, накіраваныя на каардынацыю намаганняў у барацьбе з гандлем людзьмі, Беларусь уносіць на разгляд Генасамблеі ААН на рэгулярнай аснове. Яны прымаюцца кансэнсусам з 2006 года.

У бягучым годзе тэкст зведаў некаторыя паляпшэнні. У ім больш увагі ўдзелена ўмацаванню шматбаковых партнёрстваў, тэматыцы абароны дзяцей. Адзначаны адпаведныя тэндэнцыі, уключаючы гандаль людзьмі, што ажыццяўляецца з дапамогай новых тэхналогій, выкарыстанне штучнага інтэлекту як зброі ў руках гандляроў людзьмі і ў той жа час як інструмента ў барацьбе са злачынствамі ў гэтай сферы і аказання дапамогі ахвярам.

У праекце абноўленай рэзалюцыі змешчаны заклік умацоўваць супрацоўніцтва і каардынацыю ў краінах паходжання, транзіту і назначэння ў мэтах спынення дзейнасці і ліквідацыі злачынных сетак, у тым ліку шляхам пашырэння абмену інфармацыяй.

Дакумент змяшчае актуалізаваныя звесткі аб дзейнасці Міжведамаснай каардынацыйнай групы па барацьбе з гандлем людзьмі, Упраўлення ААН па наркотыках і злачыннасці і адпаведных мандатарыяў спецыяльных працэдур Савета па правах чалавека.

"Дзякуючы правядзенню максімальна магчымай колькасці кансультацый, якія былі адкрыты для ўсіх жадаючых, шэрага двухбаковых і шматбаковых перагавораў, уліку меркавання і пажаданняў усіх бакоў удалося дасягнуць таго, што ўсе новаўвядзенні гэтага года былі ўзгоднены ўсімі ўдзельнікамі кансультацый і таксама з'яўляюцца кансэнсуснымі", - растлумачылі ў Пастаянным прадстаўніцтве Беларусі пры ААН.

Праект рэзалюцыі быў падтрыманы ў рамках Трэцяга камітэта Генеральнай Асамблеі ААН. Цяпер яго вынесуць на разгляд Генасамблеі.

версія для друку

зрабіць стартавай

дабавіць у выбранае