Падзеі

Беларусь і Ленінградская вобласць падпісалі пагадненне аб супрацоўніцтве

Фота з архiва

26 сакавіка, Мінск /Кар. БЕЛТА/. Новае пагадненне паміж урадамі Беларусі і Ленінградскай вобласці Расіі аб супрацоўніцтве ў гандлёва-эканамічнай, навукова-тэхнічнай і сацыяльна-культурнай сферах падпісана падчас дзявятага пасяджэння сумеснай камісіі па развіцці супрацоўніцтва пад старшынствам першага намесніка прэм'ер-міністра Беларусі Мікалая Снапкова і губернатара Ленінградскай вобласці Аляксандра Драздзенкі, паведамілі БЕЛТА ў прэс-службе беларускага ўрада.

"Падпісанае намі пагадненне збалансавана не штучна, а гістарычна: баланс адлюстроўвае нашы ўзаемныя інтарэсы. Асабліва важны для нас новы экалагічны напрамак. Гэта тэхналогіі і тэхніка па водаачыстцы, якія нам пастаўляе беларускі бок", - падкрэсліў Аляксандр Драздзенка. Ён адзначыў, што Ленінградская вобласць разглядае магчымасць партнёрства з Беларуссю ў сферы выбару тэхналогій будаўніцтва прадпрыемстваў па перапрацоўцы бытавога смецця, грунтуючыся на вопыце прадпрыемства ў Брэсцкай вобласці.

Па федэральным праекце "Чыстая вада" ў Ленінградскай вобласці ўжо ўстаноўлены 13 водаачышчальных станцый беларускай вытворчасці. Цяпер ідзе ўстаноўка яшчэ дзевяці такіх станцый і чатырох модульных ачышчальных збудаванняў (станцый ачысткі сцёкавых вод). У 2021-2022 гадах расійскі рэгіён плануе закупіць 108 водаачышчальных станцый і 31 станцыю ачысткі сцёкавых вод беларускай вытворчасці.

Плануецца нарасціць і пастаўкі грамадскага транспарту, які выкарыстоўвае розныя віды паліва, дарожна-будаўнічай, камунальнай і сельгастэхнікі ў Ленінградскую вобласць з Беларусі, а таксама пастаўкі ў Беларусь племянной жывёлы, угнаенняў, прадукцыі машынабудавання і дрэваперапрацоўкі.

Таксама ключавы складнік узаемавыгаднага супрацоўніцтва - узаемадзеянне на муніцыпальным узроўні. Сёння дзейнічаюць 24 дагаворы на ўзроўні гарадоў і раёнаў Ленінградскай вобласці і Беларусі. Штогод да ўзаемадзеяння на ўзроўні раёнаў падключаюцца новыя і новыя ўдзельнікі.

Бакі таксама падпісалі план мерапрыемстваў па супрацоўніцтве ў гандлёва-эканамічнай, навукова-тэхнічнай і культурнай галінах на 2021-2023 гады.

версія для друку

зрабіць стартавай

дабавіць у выбранае