Падзеі

Беларусь і Калужская вобласць падпісалі план мерапрыемстваў па супрацоўніцтве да 2029 года

28 ліпеня, Мінск /Кар. БЕЛТА/. Беларусь і Калужская вобласць РФ па выніках пасяджэння сумеснай рабочай групы ў Мінску падпісалі план мерапрыемстваў на 2027-2029 гады па рэалізацыі пагаднення аб гандлёва-эканамічным, навукова-тэхнічным і культурным супрацоўніцтве, перадае карэспандэнт БЕЛТА.

Подпісы пад дакументам паставілі міністр архітэктуры і будаўніцтва Беларусі Вадзім Альшэўскі і губернатар Калужскай вобласці Уладзіслаў Шапша.

Таксама заключаны пагадненні аб ажыццяўленні міжнародных і знешнеэканамічных сувязей у гандлёва-эканамічнай, навукова-тэхнічнай і сацыяльна-культурнай сферах паміж гарадской акругай Калугі і Брэстам, аб супрацоўніцтве па рэалізацыі інвестыцыйных праектаў у сферы вытворчасці сельскагаспадарчых беспілотных лятальных апаратаў на тэрыторыі Калужскай вобласці, аб намерах паміж урадам Калужскай вобласці і РУП "Белбудцэнтр", ААТ "Гомсельмаш".

Як адзначыў Вадзім Альшэўскі, Калужская вобласць для Беларусі - надзейны, правераны часам партнёр у Цэнтральнай федэральнай акрузе. Пасяджэнні рабочай групы даюць магчымасць вызначыць перспектыўныя напрамкі ўзаемадзеяння.

Беларусь зацікаўлена ў пашырэнні супрацоўніцтва ў будаўнічай сферы, аграрным сектары, пастаўках камунальнай, грузавой, пасажырскай, сельскагаспадарчай тэхнікі. Так, у аграрным сектары беларуская мадэль развіцця АПК даказала сваю эфектыўнасць, і беларускі бок гатовы падзяліцца набытым вопытам.

"Неабходна першарадную ўвагу ўдзяляць выкарыстанню высокатэхналагічнага абсталявання і сучаснай тэхнікі. Усё гэта прапануецца беларускімі вытворцамі. Гатовы нарошчваць пастаўкі ў рэгіён прадукцыі сельгасмашынабудавання, камбікармоў для сельскагаспадарчых жывёл і рыбы, прэміксаў, супрацоўнічаць у галіне жывёлагадоўлі, насенняводства, паставак прадукцыі беларускай сельскай гаспадаркі", - абазначыў Вадзім Альшэўскі.

Уладзіслаў Шапша падкрэсліў, што на працягу многіх гадоў паспяхова развіваецца ўзаемадзеянне Беларусі і Калужскай вобласці ў прамысловасці, сельскай гаспадарцы, будаўніцтве, гандлі, навуцы, адукацыі, культуры, турызме, спорце, экалогіі.

"Беларусь - наш ключавы партнёр у многіх сферах, чыю надзейнасць, давер і дружбу мы асабліва цэнім. 12 гадоў таму заключылі пагадненне аб гандлёва-эканамічным, навукова-тэхнічным і культурным супрацоўніцтве, у рамках якога рэгулярна падпісваем планы мерапрыемстваў на трохгадовы перыяд. Гэты дакумент заклаў фундамент сістэмнай і шматбаковай работы па ўмацаванні і пашырэнні нашых сувязей", - адзначыў Уладзіслаў Шапша.

У размове з журналістамі ён падкрэсліў, што за апошнія гады ўдалося дасягнуць значных рэзультатаў - тавараабарот склаў $700 млн. За тры гады ён павялічыўся больш як на 20%. Арыенцір на перспектыву - дасягнуць паказчыка $1 млрд.

Акрамя эканамічнага складніка адзін з важных напрамкаў - тэма адукацыі. У калужскіх ВНУ вучацца студэнты з Беларусі. "Заўсёды гатовы ў рамках абмену рабіць так, каб і нашым студэнтам такія магчымасці былі прадастаўлены. Тым больш што напрамкаў супрацоўніцтва даволі шмат", - сказаў губернатар. У прыватнасці, ён падкрэсліў значны вопыт Беларусі ў падрыхтоўцы кадраў для АПК.

Таксама абмяркоўваліся перспектывы развіцця сувязей Обнінска з беларускім бокам. Гэты горад лічыцца радзімай мірнага атама, там размешчана больш за дзясятак навукова-даследчых інстытутаў. Рэалізуецца значны праект па будаўніцтве буйнейшага ў Еўропе і першага ў Расіі завода па вытворчасці радыефармацэўтычных прэпаратаў. "Гэта прамысловая вытворчасць жыццёва важных прэпаратаў для дыягностыкі і лячэння шырокага спектра захворванняў. Мы, безумоўна, гатовы дзяліцца нашымі кампетэнцыямі," - адзначыў Уладзіслаў Шапша.

Акрамя таго, у Обнінску знаходзіцца цэнтр падрыхтоўкі спецыялістаў "Расатама" і іншыя адукацыйныя арганізацыі гэтай сферы. З улікам перспектыў ядзернай энергетыкі ў Беларусі ў рэгіёне бачаць патэнцыял для супрацоўніцтва ў гэтай сферы.