Падзеі
"Барані вас бог!" Лукашэнка даў жорсткі наказ кіраўніцтву Віцебскай вобласці
15 студзеня, Мінск /Кар. БЕЛТА/. Прэзідэнт Беларусі Аляксандр Лукашэнка, прымаючы рашэнне аб назначэнні Аляксандра Рагожніка старшынёй Віцебскага аблвыканкама, падкрэсліў неабходнасць забяспечыць захаванасць буйной рагатай жывёлы, асабліва маладняку, перадае карэспандэнт БЕЛТА.
Кіраўнік дзяржавы, абазначаючы асноўныя задачы для новага кіраўніка, зрабіў акцэнт на вырашэнні праблемы з падзяжом жывёлы. "Вам трэба сур'ёзна гэтым займацца. І хачу вас папярэдзіць, барані бог, там у вас будзе назірацца мор маладняку", - сказаў Прэзідэнт.
Аляксандр Лукашэнка таксама папярэдзіў, што ва ўрадзе плануецца правесці нараду, у тым ліку і па сітуацыі ў сельскай гаспадарцы. "Разбяромся з усімі абласцямі. У нас праблем хапае і ў Магілёўскай, і ў Віцебскай, і ў Брэсцкай, і ў Гродзенскай абласцях, і ў Мінску. Гэтыя праблемы ўсюды сустракаюцца. Але ў Віцебскай вобласці яны проста цвітуць і пахнуць, яны працвітаюць".
"Таму адразу вас папярэджваю: барані бог, мне даложаць ці, не дай бог, я ўбачу, як вы ні хаваліся б, гібель маладняку жывёл. Раздайце па дварах, рабіце што хочаце, але трэба выратаваць і абараніць будучыню вашых зарплат і даходаў", - падкрэсліў кіраўнік дзяржавы.
Паводле яго слоў, прэм'ер-міністру дадзена даручэнне забяспечыць Віцебскую вобласць усім неабходным для таго, каб арганізаваць належныя ўмовы ўтрымання цялят, што набывае асаблівую актуальнасць у перыяд зімовых маразоў. Цяляты павінны знаходзіцца не на адкрытай прасторы ў пластыкавых боксах, а хаця б пад дахам.
Пакуль, як заўважыў Прэзідэнт, прыкладаў бяздушнага стаўлення да жывёл у сельскай гаспадарцы хапае. Кіраўнік дзяржавы даручыў адказным асобам перадаць новаму кіраўніку вобласці звесткі аб гэтых і іншых раней выяўленых недахопах. "Яго як чалавек, які ў прамысловасці прапрацаваў, ахопіць жах, калі ўбачыць гэтыя "цуды", - сказаў Аляксандр Лукашэнка.
У ліку прыярытэтных задач у АПК для Віцебскай вобласці Прэзідэнт абазначыў будаўніцтва малочнатаварных комплексаў, комплексаў па адкорме і ўзнаўленні буйной рагатай жывёлы, а таксама свіней. "Там, па-мойму, аж паўмільёна тон мы калісьці атрымлівалі. Сёння мы павінны крыху больш планаваць", - сказаў Аляксандр Лукашэнка.
У гэтым плане Віцебская вобласць можа ў поўнай меры разлічваць на дапамогу з боку дзяржавы. "Мы сваё плячо падставім, але мы павінны ведаць, куды будуць накіраваны дзяржаўныя грошы і, самае галоўнае, якая ад гэтага будзе аддача, - падкрэсліў Прэзідэнт. - Гэта нядобра, што мы комплексы пабудавалі (па краіне іх сотні пабудаваны ўжо), а яны не запоўнены добрай жывёлай. А некаторыя комплексы калі і запоўнены, то там карова дае малака, як каза. Паўстае пытанне, навошта мы будавалі гэтыя комплексы?"
"Таму правільна, што давялі паказчыкі для комплексаў: сем і вышэй тысяч кілаграм малака ад каровы. Інакш нельга", - дадаў кіраўнік дзяржавы. І ў сувязі з гэтым перасцярог ад спроб завышаць даныя і рабіць прыпіскі: "Папярэджваю аб недапушчальнасці хлусні. Аляксандр Мікалаевіч, ніякай хлусні быць не павінна. Гэта недапушчальна".
версія для друку
зрабіць стартавай
дабавіць у выбранае