Бізнес-навіны

"Вялікі камень" да 2025 года прыцягне мінімум 5 кампаній з аб'ёмам інвестыцый больш як $50 млн

Фота з архiва

6 снежня, Мінск /Кар. БЕЛТА/. "Вялікі камень" да 2025 года прыцягне ў індустрыяльны парк мінімум пяць кампаній з аб'ёмам інвестыцый больш як $50 млн. Аб гэтым паведаміў карэспандэнту БЕЛТА кіраўнік адміністрацыі парка "Вялікі камень" Аляксандр Ярашэнка, каменціруючы Дырэктыву нумар 9 аб развіцці двухбаковых адносін Беларусі з Кітаем.

"Дырэктыва нумар 9 актыўна пашырае развіццё нашага сумеснага праекта - Кітайска-беларускага індустрыяльнага парка "Вялікі камень". Для забеспячэння эфектыўнай дзейнасці нашых рэзідэнтаў прадаўжае рабіцца акцэнт на прыцягненні ў парк інавацыйных праектаў, стартапаў у цеснай кааперацыі ў тым ліку і з беларускімі прадпрыемствамі, - сказаў Аляксандр Ярашэнка. - Мы пашыраем сферы эканамічнай дзейнасці, як гэта прадугледжана ўказам нумар 215. У прыватнасці, пад пашырэннем маецца на ўвазе прымяненне тэхналогіі 5G, штучнага інтэлекту. Акрамя таго, асаблівы акцэнт зроблены на прыцягненні якарных праектаў. Размова ідзе аб інвестарах, якія прыходзяць з кампаніямі з аб'ёмам інвестыцый больш як $50 млн. Перад намі пастаўлена задача, каб да 2025 года не менш за пяць такіх кампаній мы прыцягнулі ў "Вялікі камень".

Таксама ў дакуменце гаворыцца, што да 2025 года колькасць рэзідэнтаў індустрыяльнага парка павінна скласці не менш за 170 кампаній.

Як паведамлялася раней, Дырэктыва нумар 9 накіравана на далейшае паглыбленне стратэгічнага партнёрства Беларусі з Кітаем па шырокім спектры напрамкаў у 2021-2025 гадах і з'яўляецца лагічным працягам аднайменнай Дырэктывы на 2015-2021 гады.

Прыярытэтнымі задачамі на бліжэйшую перспектыву вызначаны ўмацаванне супрацоўніцтва ў палітычнай сферы, захаванне і прымнажэнне каштоўнасцей дружбы і ўзаемнай падтрымкі, нарошчванне гандлёва-эканамічнага, фінансавага, інвестыцыйнага ўзаемадзеяння, рэалізацыя ініцыятывы "Пояс і шлях". У ліку важных задач таксама пашырэнне міжрэгіянальных сувязей, развіццё супрацоўніцтва ў ваеннай і ваенна-тэхнічнай галінах, у сферы лічбавай эканомікі і інфармацыйна-камунікацыйных тэхналогій, умацаванне навукова-тэхнічнага ўзаемадзеяння, развіццё адносін у гуманітарнай сферы.

У мэтах выканання названых задач органам дзяржаўнага кіравання і іншым уключаным у супрацоўніцтва з КНР суб'ектам эканамічнай дзейнасці даручаецца забяспечыць рэалізацыю каля паўсотні канкрэтных практычных мер.

Эфектыўнае выкананне пастаўленых мэт будзе садзейнічаць вывядзенню двухбаковых адносін на якасна новы ўзровень.

версія для друку

зрабіць стартавай

дабавіць у выбранае