Бізнес-навіны

У Мінску з 29 верасня па 2 кастрычніка знаходзяцца з візітам прадстаўнікі васьмі вядучых французскіх кампаній, сярод якіх можна вылучыць такія прадпрыемствы, як Vinci, Accor, Leroy Merlin, Egis, CIFAL. У гэтыя ж дні ў беларускай сталіцы будзе дэлегацыя кіраўніцтва буйнейшай партугальскай будаўнічай кампаніі Mota – Engil.

"Прадстаўнікі французскіх і партугальскіх кампаній абмяркуюць з беларускімі партнёрамі перспектывы рэалізацыі сумесных праектаў у нашай краіне ў галіне будаўніцтва, сельскай гаспадаркі, энергетыкі, гасцінічнага бізнесу, развіцця гандлёвых рознічных сетак. Акрамя таго, плануецца падпісанне шэрага кантрактаў на пастаўкі беларускай тэхнікі і прадукцыі дрэваапрацоўкі на замежныя рынкі", - паведамілі ў пасольстве.

Плануецца, што прадстаўнікі замежных дзелавых колаў правядуць перагаворы ва ўрадзе, Мінбудархітэктуры, Мінтрансе, Мінэнерга, канцэрнах «Белдзяржхарчпрам» і «Беллеспаперапрам», Мінаблвыканкаме, а таксама з беларускімі дзелавымі партнёрамі. У ходзе візіту прадстаўнікоў французскіх і партугальскіх дзелавых колаў суправаджае пасол Беларусі ў Францыі і Партугаліі (па сумяшчальніцтве) Павел Латушка.

У час візіту для беларускіх прадпрыемстваў харчовай прамысловасці адбудзецца прэзентацыя магчымасцей і ўмоў арганізацыі продажаў іх прадукцыі ў вялікія французскія і іншыя еўрапейскія гандлёвыя сеткі.