Бізнес-навіны

"Веласіпед і матацыкл - гэта будучыня". Лукашэнка ацаніў новыя мадэлі мінскага мотавелазавода

16 студзеня, Мінск /Кар. БЕЛТА/. Прэзідэнт Беларусі Аляксандр Лукашэнка 16 студзеня ў час наведвання Мінскага гарадскога тэхнапарка арыентаваў ТАА "МотаВелаЗавод" на пашырэнне вытворчасці, перадае карэспандэнт БЕЛТА.

У час наведвання тэхнапарка Аляксандр Лукашэнка азнаёміўся з выстаўкай прадукцыі прадпрыемстваў-рэзідэнтаў. Асаблівую ўвагу ён удзяліў тэхніцы ТАА "МотаВелаЗавод". Як заявіў дырэктар прадпрыемства Сяргей Манько, беларуская мота- і велапрадукцыя карыстаецца вялікім попытам як унутры краіны, так і на замежных рынках.

"Ну вось. А гаварылі, нам не патрэбны ні веласіпеды, ні матацыклы. Аказваецца, нам усё трэба. Веласіпед і матацыкл - гэта будучыня", - падкрэсліў Прэзідэнт.

Кіраўнік дзяржавы пацікавіўся, якім чынам на прадпрыемстве рэалізуецца палітыка імпартазамяшчэння. Як было адзначана, да вытворчасці падключаны і іншыя прадпрыемствы сістэмы Міністэрства прамысловасці, а таксама прыватныя кампаніі. Адны выпускаюць сядзенні, іншыя - амартызатары і гэтак далей. Па асобных мадэлях узровень лакалізацыі дасягае 80 працэнтаў.

"Гэта добра зрабілі, што задзейнічалі, - адзначыў Аляксандр Лукашэнка. - Але каб не спыняліся".

У час наведвання тэхнапарка Прэзідэнт азнаёміўся з шэрагам вытворчасцей, якія працуюць на гэтай тэрыторыі. Напрамкі самыя розныя, але іх аб'ядноўвае адзін важны момант - гэта імпартазамяшчальная прадукцыя запатрабавана ў Беларусі і мае добры экспартны патэнцыял.

Напрыклад, тут вырабляюць комплексныя лініі для перапрацоўкі рапсу, соі і сланечніка. "Калі патрэбна будзе дапамога, вы гаварыце. Для нас важна, каб вы развіваліся", - сказаў кіраўнік дзяржавы.

Іншая вытворчасць працуе ў сферы вакуумна-плазменных тэхналогій. Яшчэ адна займаецца праектаваннем лёгкіх сталёвых танкасценных канструкцый.

Аляксандр Лукашэнка таксама наведаў мотавелазавод, з якога дзесяцігоддзі таму і пачыналася прамысловая гісторыя гэтых плошчаў на Партызанскім праспекце сталіцы. Вытворчасць дзякуючы рашэнням Прэзідэнта атрымала новае дыханне. Шмат зроблена ў плане пашырэння асартыменту і лакалізацыі прадукцыі.

Зайшоў Прэзідэнт на мотавелазаводзе і ў памяшканне, дзе работнікі могуць адпачыць і падсілкавацца, з'еўшы ежу, узятую з сабой.

Але хутка, як далажыў старшыня Мінгарвыканкама Уладзімір Кухараў, у Мінскім гарадскім тэхнапарку з'явіцца сталовая.

Аляксандр Лукашэнка адзначыў: важна вызначыцца па цэнах, каб яны былі даступныя. Тут жа размова ў цэлым пра сацыяльную сферу, якая фарміруецца вакол тэхнапарка, у тым ліку тэма інтэрнатаў, арэнднага жылля.

"Да людзей трэба ставіцца добра", - такое агульнае патрабаванне беларускага лідара.

версія для друку

зрабіць стартавай

дабавіць у выбранае