Бізнес-навіны

У Чунцыне абмеркавалі новыя кропкі росту супрацоўніцтва Беларусі і Кітая

2 лютага, Мінск /Аліна Грышкевіч - БЕЛТА/. Надзвычайны і Паўнамоцны Пасол Рэспублікі Беларусь у КНР Юрый Сянько наведаў Чунцын - кітайскі горад цэнтральнага падпарадкавання з больш як 32-мільённым насельніцтвам. Аб гэтым карэспандэнту БЕЛТА паведамілі ў пасольстве Беларусі ў Пекіне.

Адным з пунктаў праграмы трохдзённага наведвання беларускім дыпламатам Чунцына стала знаёмства з дзейнасцю даследчага цэнтра найбуйнейшай кітайскай карпарацыі па вытворчасці аўтамабіляў Changan Automobile Group. "У час перагавораў з кіраўніцтвам кампаніі былі абмеркаваны актуальныя пытанні двухбаковага супрацоўніцтва", - адзначылі ў дыпламатычнай місіі.

У час наведвання Цэнтра культуры Беларусі і турызму ў Чунцыне пасол таксама даў інтэрв'ю Чунцынскаму  тэлебачанню, у якім высока ацаніў узровень і перспектывы развіцця двухбаковага супрацоўніцтва кітайскага рэгіёна з нашай краінай.

Акрамя таго, адбыліся перагаворы беларускага дыпламата з кіраўніком Канцылярыі па лагістыцы і портам  г.Чунцын Ба Чуанцзянам. Бакі абмеркавалі пытанні паглыблення ўзаемадзеяння Рэспублікі Беларусь і г.Чунцын у сферы лагістыкі і транспарту. Асаблівая ўвага была ўдзелена ўзаемнаму павелічэнню чыгуначных кантэйнерных перавозак па маршруце "Кітай-Еўропа-Кітай" у рамках ініцыятывы "Адзін пояс, адзін шлях".

Юрый Сянько таксама правёў сустрэчу са старшынёй праўлення карпарацыі Zongshen Industrial Group Цзо Цзуншэнем. Гэта кампанія ўваходзіць у лік 500 буйнейшых прадпрыемстваў Кітая і топ-100 кампаній Чунцына, асноўнымі напрамкамі дзейнасці якой з'яўляюцца вытворчасць рухавікоў, матацыклаў, сельгастэхнікі. У час размовы было абмеркавана функцыянаванне сумеснага прадпрыемства ААТ "Гомсельмаш" і карпарацыі "Цзуншэнь", а таксама новыя напрамкі супрацоўніцтва кітайскай кампаніі з Рэспублікай Беларусь.

Наведванне Чунцына - першая рэгіянальная паездка пасла Беларусі па Кітаі, асноўным мерапрыемствам якой стала ўрачыстая цырымонія адкрыцця Генеральнага консульства нашай краіны ў гэтым горадзе.

Як паведамлялася раней БЕЛТА, у Чунцыне 28 студзеня ўрачыста адкрылася Генеральнае консульства Беларусі. Цырымонія адкрыцця консульскай установы была прымеркавана да 29-й гадавіны ўстанаўлення дыпламатычных адносін паміж Рэспублікай Беларусь і Кітайскай Народнай Рэспублікай.

Чунцын - буйнейшы па плошчы з чатырох кітайскіх гарадоў цэнтральнага падпарадкавання. Горад па плошчы супастаўны з цэлай краінай, напрыклад, з Аўстрыяй.

Дарэчы, паміж Чунцынам і Мінскай вобласцю з 2017 года развіваюцца пабрацімскія адносіны.

версія для друку

зрабіць стартавай

дабавіць у выбранае