Бізнес-навіны

У Беларусі выбралі лепшых экспарцёраў 2024 года

30 ліпеня, Мінск /Кар. БЕЛТА/. Пераможцамі рэспубліканскага конкурсу "Лепшы экспарцёр 2024 года" сталі 19 прадпрыемстваў. Аб гэтым расказаў старшыня Беларускай гандлёва-прамысловай палаты Міхаіл Мятлікаў у час урачыстай цырымоніі ўзнагароджвання ў Мінску, паведамляе карэспандэнт БЕЛТА.

На конкурсе ў бягучым годзе рэкордная колькасць фіналістаў і пераможцаў - 185. Іх уклад у экспарт краіны па выніках мінулага года склаў больш за $10 млрд, што складае 21 працэнт ад усяго экспарту. Усяго ў конкурсе 19 пераможцаў у 17 намінацыях. Іх непасрэдны ўклад у экспарт склаў больш за $5 млрд. Калі ў разліку на аднаго працуючага ў гэтых прадпрыемствах, то гэта больш за $100 тыс.

Уклад істотны, падкрэсліў Міхаіл Мятлікаў, таму пераможцаў і фіналістаў па праву можна назваць лепшымі экспарцёрамі краіны.

"Пераможцаў мы вызначалі па агульных выніках экспарту, па выніку экспарту на аднаго работніка. Улічваецца, вядома, геаграфія экспарту, наяўнасць уласнай тавараправоднай сеткі за мяжой. Пераможцы ў 17 намінацыях пастаўлялі прадукцыю ў 113 краін свету - гэта добры вынік для 19 нашых прадпрыемстваў. Мы імі даражым і ганарымся", - сказаў кіраўнік БелГПП.

Лепшых экспарцёраў краіны БелГПП рэкламуе на ўсіх бізнес-форумах, на сваім сайце. "У тым ліку мы знаёмім з імі наш замежны бізнес, з якім працуем", - адзначыў Міхаіл Мятлікаў.

Цырымонія ўзнагароджвання пераможцаў конкурсу "Лепшы экспарцёр" ужо традыцыйна праводзіцца ў час семінара з кіраўнікамі дыппрадстаўніцтваў. "Таму ў экспарцёраў сёння ёсць добрая магчымасць сустрэцца з пасламі ў нефармальнай абстаноўцы, падвесці вынікі супрацоўніцтва і, вядома, наладзіць новыя кантакты", - сказаў Міхаіл Мятлікаў.

Міністр замежных спраў Максім Рыжанкоў заўважыў, што беларускія прадпрыемствы ў няпростых умовах санкцыйнага націску могуць паспяхова прэзентаваць свой тавар і прадаваць паслугі, а таксама дабівацца ўліку інтарэсаў Беларусі на самых далёкіх рынках. "Я вельмі добра сабе ўяўляю работу многіх канкрэтных экспарцёраў, міністэрстваў, ведамстваў, нашых паслоў па дасягненні тых задач, якія стаяць у нашай эканоміцы сёння", - падкрэсліў ён, дадаўшы, што прадпрыемствы Беларусі паказалі вельмі высокі вынік нават за першае паўгоддзе 2025 года.

Максім Рыжанкоў зачытаў прывітальны адрас прэм'ер-міністра Аляксандра Турчына.

версія для друку

зрабіць стартавай

дабавіць у выбранае