Бізнес-навіны

"Гэта тое, што цяпер на корані". Па запэўненні ўрада, у Беларусі плануюць сабраць каля 11 млн тон збожжа

Фота з архiва

18 ліпеня, Мінск /Кар. БЕЛТА/. У Беларусі плануюць сабраць каля 11 млн т збожжа. Аб гэтым Прэзідэнт Беларусі Аляксандр Лукашэнка заявіў 18 ліпеня на селектарнай нарадзе па пытаннях уборачнай кампаніі, перадае карэспандэнт БЕЛТА.

"Па запэўненні ўрада, прагназуемы валавы збор збожжа і збожжавых культур у бункернай вазе можа скласці каля 11 мільёнаў тон - тое, што нам трэба. Гэта тое, што цяпер на корані. Гэта трэба яшчэ без страт убраць", - заўважыў Аляксандр Лукашэнка.

У той жа час Камітэт дзяржаўнага кантролю, Генеральная пракуратура і Міністэрства ўнутраных спраў інфармуюць Прэзідэнта аб тым, што ў некаторых рэгіёнах дрэнна падрыхтаваліся да ўборачнай кампаніі. Напрыклад, стаяць няспраўнымі і збожжаўборачныя камбайны, і зернесушыльныя комплексы.

Частка адрамантаваных камбайнаў не прайшла дзяржтэхагляд. Таму нядзіўна, што потым нагрузка на адзін працуючы камбайн павялічваецца, сказаў кіраўнік дзяржавы.

"Збожжаўборачныя камбайны не гатовы да работы практычна ў кожнай трэцяй з правераных гаспадарак рэспублікі. Пры гэтым у асобных арганізацыях рамонт нават не пачыналі з-за адсутнасці запасных частак і механізатарскіх кадраў. У шэрагу сельгасарганізацый не падрыхтаваны склады для прыёмкі ўраджаю. Не ўсюды належным чынам паклапаціліся аб забеспячэнні тэхнікі гаручым, запаснымі часткамі, з-за чаго магчымы страты рабочага часу. Зноў жа, ніяк не пераможам прыпіскі. У 5 працэнтах правераных гаспадарак устаноўлены выпадкі, калі тэхніка была гатова да работы толькі на паперы. Дзіўна, каго спрабуюць падмануць", - абазначыў праблемныя пытанні Аляксандр Лукашэнка.

Паводле яго слоў, уборачная кампанія толькі пачалася, а Камітэт дзяржаўнага кантролю ўжо выявіў факты няякаснай уборкі ўраджаю. Парушэнні зафіксаваны ў асобных гаспадарках Свіслацкага і Салігорскага раёнаў. Аналагічная сітуацыя і ў нарыхтоўцы кармоў. Нізкія тэмпы ўборкі траў з-за няспраўнай тэхнікі. У многіх гаспадарках своечасова не праведзена падкормка азотнымі ўгнаеннямі шматгадовых траў.

На 14 ліпеня ў Віцебскай вобласці не быў завершаны першы ўкос шматгадовых траў на плошчы амаль 20 тыс. га. Прэзідэнт пацікавіўся, у чым праблема і якія гаспадаркі не спраўляюцца з работамі.

версія для друку

зрабіць стартавай

дабавіць у выбранае