Бізнес-навіны

У Беларусі патэнцыял прыросту экспарту ў прамысловасці ацэньваецца ў амаль $5,1 млрд

Фота з архiва

7 кастрычніка, Мінск /Кар. БЕЛТА/. У Беларусі патэнцыял прыросту экспарту ацэньваецца ў памеры $5,07 млрд.Такія даныя змешчаны ў даследаванні Еўразійскага банка развіцця аб патэнцыяле прамысловасці ў краінах ЕАЭС. Ключавыя высновы прадстаўлены ў час вебінара ад ЕАБР "Патэнцыял развіцця прамысловасці высокіх перадзелаў у Еўразійскім рэгіёне", паведамляе БЕЛТА.

Дадатковае павелічэнне можа скласці 16 працэнтаў, а агульны эканамічны эфект - $19,73 млрд.

У топ-10 таварных груп з найбольшым экспартным патэнцыялам увайшлі аўтамабілі, машыны і абсталяванне, хімічная прадукцыя, прадукты харчавання, металы, адзенне, камп'ютары, фармацэўтычная прадукцыя, электрычнае абсталяванне, гумавыя і пластмасавыя вырабы.

Беларусь у свеце займае 33-е месца па індэксе эканамічнай складанасці (паказчык, які адлюстроўвае ўзровень складанасці і дыверсіфікацыі вытворчых магчымасцей краіны на аснове аналізу яе экспарту). Доля апрацоўчай прамысловасці ў ВУП складае 20,3 працэнта (або $15,4 млрд), сярэдніх і высокіх перадзелаў у апрацоўчай прамысловасці - 19,8 працэнта.

Што датычыцца імпартазамяшчэння, то тут патэнцыял прыросту ацэньваецца таксама ў прыкладна $5 млрд. Найбольшыя перспектывы ў сферах аўтамабілебудавання, хімічнай прамысловасці, у вытворчасці машын і абсталявання, металаў, прадуктаў харчавання, электрычнага абсталявання, камп'ютараў, тэкстылю, рызінавых і пластмасавых вырабаў, гатовых металічных вырабаў, акрамя машын.

"Беларусь знаходзіцца ў топах па ўзроўні эканамічнай складанасці - адна з самых складаных з прамысловага пункту гледжання эканомік у нашым рэгіёне, згодна з міжнародным індэксам. Трэба далей развівацца. Там, дзе ёсць канкурэнтныя перавагі, можна знайсці рэзервы для экспарту, імпартазамяшчэння", - адзначыў кіраўнік Цэнтра галіновага аналізу Дырэкцыі па аналітычнай рабоце Еўразійскага банка развіцця Арман Ахунбаеў.

Прамысловасць Еўразійскага рэгіёна (у які ўваходзяць Арменія, Беларусь, Казахстан, Кыргызстан, Расія, Таджыкістан, Узбекістан) уяўляе сабой буйнейшы сектар эканомікі, фарміруючы каля 31 працэнта сукупнага ВУП. Унутры гэтага сектара ключавая роля прыналежыць апрацоўчай прамысловасці, якая генерыруе 44,2 працэнта валавой дабаўленай вартасці прамысловасці.

версія для друку

зрабіць стартавай

дабавіць у выбранае