Бізнес-навіны

У Беларусі бачаць добрыя перспектывы для рэалізацыі трансгранічных праектаў з Польшчай

26 сакавіка, Мінск /Кар. БЕЛТА/. У Беларусі бачаць добрыя перспектывы для рэалізацыі трансгранічных праектаў з Польшчай. Размова аб гэтым ішла на сустрэчы старшыні Савета Рэспублікі Міхаіла Мясніковіча са старшынёй Польскай гаспадарчай палаты Анджэем Арандарскім, перадае карэспандэнт БЕЛТА.

У час сустрэчы абмяркоўваліся пытанні правядзення эканамічнага форуму "Добрасуседства", які Беларуская гандлёва-прамысловая палата штогод арганізуе з Польска-беларускай ГПП. "Форум "Добрасуседства" - гэта і рэгіянальныя кантракты, і міждзяржаўныя, - сказаў Міхаіл Мясніковіч. - Бачу добрую перспектыву па трансгранічных праектах, у тым ліку з удзелам Еўрасаюза".

Спікер адзначыў сістэмнасць двухбаковых кантактаў у палітычнай, эканамічнай і гуманітарнай сферах. Беларуская парламенцкая дэлегацыя на чале з Міхаілам Мясніковічам у лютым 2019 года наведала Польшчу, дзе правяла сустрэчу, у тым ліку з Анджэем Арандарскім. Сёння на перагаворах у Мінску спікер нагадаў аб добрай размове ў Варшаве, якая настройвае на актыўную пазітыўную работу. "Нам трэба больш мець сумесных праектаў, ініцыятыў", - упэўнены Міхаіл Мясніковіч.

У сваю чаргу Анджэй Арандарскі ў цэлым пазітыўна ацаніў развіццё двухбаковага гандлёва-эканамічнага ўзаемадзеяння. Пры гэтым ён лічыць, што бакам трэба ўмацоўваць супрацоўніцтва паміж прадпрымальнікамі. "Вельмі важна, каб яны разам працавалі, адкрывалі сумесныя кампаніі", - сказаў старшыня Польскай гаспадарчай палаты. Дадатковы імпульс, на яго думку, трэба надаць узаемадзеянню абласных аддзяленняў БелГПП з рэгіянальнымі польскімі палатамі. "Добрасуседства" грунтуецца на супрацоўніцтве рэгіёнаў, і гэта заўсёды прыносіць поспех, рэзюмаваў Анджэй Арандарскі.

версія для друку

зрабіць стартавай

дабавіць у выбранае