Бізнес-навіны
Турчын расказаў пра занепакоенасць станам асобных прадпрыемстваў прамысловасці і няпростыя рашэнні
15 кастрычніка, Мінск /Кар. БЕЛТА/. Стан асобных прадпрыемстваў у прамысловасці выклікае трывогу і іх давядзецца браць пад ручное кіраванне на некаторы перыяд часу. Аб гэтым заявіў журналістам прэм'ер-міністр Аляксандр Турчын па выніках даклада Прэзідэнту Беларусі Аляксандру Лукашэнку, перадае карэспандэнт БЕЛТА.
Журналісты пацікавіліся, як ідуць справы ў прамысловым сектары, які кіраўнік дзяржавы даручаў курыраваць Аляксандру Турчыну асабіста. "Прамысловасць адыгрывае велізарную ролю ў эканоміцы нашай краіны. Задачы - эфектыўная работа прамысловасці, як любой з галін эканомікі. Зразумела занепакоенасць Прэзідэнта станам прамысловасці. І ва ўрада занепакоенасць выклікае стан нашага машынабудавання. Гэта звязана як з шэрагам аб'ектыўных, так і суб'ектыўных прычын", - растлумачыў прэм'ер-міністр.
Ён падкрэсліў, што на гэтым этапе вельмі важна выпрацаваць дакладныя механізмы і разуменне таго, як гэтыя прадпрыемствы павінны працаваць для таго, каб забяспечваць эфектыўную работу, бягучы прыбытак, выплачваць людзям дастойную заработную плату і абслугоўваць свае фінансавыя абавязацельствы. "Таму я таксама не скажу, што моцны аматар гэтага метаду кіравання, але некаторыя прадпрыемствы мы фактычна будзем браць на ручное кіраванне. Прынамсі на нейкі перыяд. Для таго каб кантраляваць тыя працэсы, якія там адбываюцца", - дадаў Аляксандр Турчын.
Неабходнасць гэтага ён растлумачыў таксама тым, каб кіраўнікі не ішлі па шляху "простых" рашэнняў. "Што такое "простае" рашэнне? Вырабіць прадукцыю, яе на склад адправіць або адправіць яе сваім дылерам за мяжу, не атрымаўшы за гэта грошы. Рашэнне геніяльнае па сваёй прастаце, але нясе вельмі вялікія наступствы ў выглядзе адсутнасці абаротных сродкаў і рэзкага пагаршэння фінансавага стану", - адзначыў кіраўнік урада.
"Эфектыўная работа, збалансаваны рост - гэта з'яўляецца вызначальным фактарам для развіцця прадпрыемстваў. Таму прамысловасць пад нашым асаблівым кантролем", - падкрэсліў ён.
Аляксандр Турчын звярнуў увагу, што ў гэтым годзе ўжо былі знойдзены рашэнні, якія дазволілі шэрагу прадпрыемстваў павысіць эфектыўнасць работы.
Нядаўна па рашэнні Прэзідэнта абнавілася кіраўніцтва на некалькіх буйных прадпрыемствах прамысловага сектара, новыя кіраўнікі ўжо прадстаўлены працоўным калектывам. І ўрад чакае ад іх перш за ўсё ўсебаковага комплекснага аналізу бягучай сітуацыі, а таксама прапаноў альбо выпрацоўкі мер, якія павінны сітуацыю палепшыць. "Я не хачу сказаць, што на кожным з іх сітуацыя дрэнная. У кагосьці горшая, у кагосьці лепшая. Але іх задача (новых кіраўнікоў. - Заўвага БЕЛТА) - аналіз і выпрацоўка мер і прапаноў па паляпшэнні сітуацыі, - заявіў прэм'ер-міністр. - На гэтых прадпрыемствах працуе нямала нашых людзей, таму мы павінны забяспечыць іх эфектыўную работу".
Прэм'ер-міністр звярнуў увагу, што на прадпрыемствах прайшла мадэрнізацыя і ў гэта былі ўкладзены немалыя грошы. "Не заўсёды, на жаль, гэта дало патрэбны эфект. Таму задача (якая цяпер перад імі стаіць. - Заўвага БЕЛТА), каб прадпрыемствы працавалі, атрымлівалі прыбытак, выплачвалі заработную плату і абслугоўвалі свае фінансавыя абавязацельствы", - сказаў ён.
Паводле слоў Аляксандра Турчына, у бліжэйшы час урад будзе прапаноўваць кіраўніку дзяржавы кадравыя рашэнні і па іншых структурах. "Таму што цяпер час, які патрабуе прыняцця рашэнняў, адказнасці і разумення, што за тваёй спінай, як кіраўніка, стаяць калектывы. І ты павінен працаваць, каб твае калектывы мелі ўпэўненасць у заўтрашнім дні", - адзначыў ён. Кіраўнік урада падкрэсліў, што крытэрыем для кадравых рашэнняў заўсёды з'яўляецца аб'ектыўная ацэнка дзейнасці: "Зыходзячы з выніку: ёсць вынік работы, значыць, прэтэнзій няма. Калі няма выніку, мы не можам доўга на гэта глядзець".
Як паведамлялася, Прэзідэнт Беларусі Аляксандр Лукашэнка 13 кастрычніка даў згоду на назначэнне генеральных дырэктараў ААТ "Белшына", ААТ "Магілёўхімвалакно" і ААТ "Гомсельмаш". "Яны павінны выцягнуць гэтыя прадпрыемствы, і мы павінны спыніць усялякія размовы па гэтых прадпрыемствах", - абазначыў ключавыя задачы кіраўнік дзяржавы. І арыентаваў на тое, што вырашаць існуючыя праблемы неабходна, абапіраючыся на ўласныя сілы і рэсурсы прадпрыемстваў. "Не спадзявайцеся, што вы прыйдзеце з бюджэту возьмеце грошы. Грошы атрымаеце толькі пад канкрэтныя пастаўкі прадукцыі. Ёсць у вас прадукцыя на экспарт прадаць і цвёрда вы атрымаеце грошы - вам пазычым капейку. Прадалі - і назад вярнулі. Тут пра гады, стагоддзі, дзесяцігоддзі размовы не ідзе. Узяў - заўтра вярнуў. Толькі так", - папярэдзіў Аляксандр Лукашэнка.
версія для друку
зрабіць стартавай
дабавіць у выбранае