Бізнес-навіны

Тавараабарот Беларусі і Індыі ў 2019 годзе чакаецца на ўзроўні $600 млн

6 жніўня, Мінск /Таццяна Лісатовіч - БЕЛТА/. Тавараабарот Беларусі і Індыі па выніках 2019 года можа скласці каля $600 млн. Аб гэтым паведаміў сёння журналістам Надзвычайны і Паўнамоцны Пасол Беларусі ў Індыі, Бангладэш, Непале, Шры-Ланцы (па сумяшчальніцтве) Андрэй Ржавускі, перадае карэспандэнт БЕЛТА.

"Калі падлічыць наш экспарт за апошнія паўгода, у нас атрымалася крыху менш за $300 млн. Гэта практычна тая ж сума, што нагандлявалі па экспарце за ўвесь мінулы год", - адзначыў дыпламат. На яго думку, узаемны тавараабарот па выніках года будзе каля $600 млн. "У нас ёсць яшчэ вельмі вялікія зачыны да канца года, мы спадзяёмся, што будуць пастаўкі складанай тэхнічнай прадукцыі", - сказаў пасол.

У цэлым рэгіён Індыі, Бангладэш, Непала, Шры-Ланкі цікавы Беларусі, нашы тавары там вельмі запатрабаваны. Сёння асноўны артыкул беларускага экспарту - калійныя ўгнаенні, яны патрэбны ў гэтых краінах. "Але мы стараемся пашыраць нашу таварную наменклатуру: пастаўляем розную прадукцыю нафтахіміі, паперу, складаныя механізмы, маем намер паставіць у Індыю грузавыя аўтамабілі. Ёсць праект па сумесным выпуску трактароў (або нейкіх кампанентаў для іх), камбайнаў. У нас вельмі нядрэнныя перспектывы па пастаўках кар'ерных самазвалаў у Індыю, - расказаў Андрэй Ржавускі. - Ёсць напрацоўкі з Бангладэш па аказанні садзейнічання ў механізацыі сельскай гаспадаркі. Акрамя таго, гэта пастаўка абсталявання для поўнага цыкла вытворчасці малочных і мясных прадуктаў".

Акрамя таго, у ліпені быў падпісаны вялікі кантракт на пастаўку калійных угнаенняў у Бангладэш. Размова ідзе аб 450 тыс. т угнаенняў, пастаўкі пачаліся ўжо. "Вось-вось павінны падпісаць кантракт з Індыяй", - дадаў дыпламат.

Вялікі патэнцыял у нарошчванні тавараабароту паміж Беларуссю і Індыяй бачыць і старшыня БелГПП Уладзімір Улаховіч. "Індыя - глабальны ігрок, рост яе эканомікі складае 8 працэнтаў. Тут дынамічна развіваецца прамысловы сектар, IT-сфера", - адзначыў ён.

"Іншыя краіны, якія мы адносім да гэтага рэгіёна, таксама маюць свой патэнцыял", - лічыць Уладзімір Улаховіч. У прыватнасці, Бангладэш мае патрэбу ва ўсім, што датычыцца машынабудавання, аграрных тэхналогій, прадуктаў харчавання. У Шры-Ланку пастаўляюцца пакуль у асноўным калійныя ўгнаенні, але ёсць і праекты па развіцці аграрнага сектара, сур'ёзны напрамак для супрацоўніцтва - фармацэўтыка.

Сёння ў Беларускай гандлёва-прамысловай палаце праходзіць сустрэча з ганаровымі консуламі Беларусі ў Бангладэш, Індыі, Непале і Шры-Ланцы. Пасля заканчэння пленарнай часткі запланаваны перагаворы прадстаўнікоў беларускага бізнесу з дыпламатамі ў фармаце B2D, дзе будуць разгледжаны перспектывы ўзаемадзеяння па пашырэнні экспарту, пытанні збыту беларускай прадукцыі.-0-

версія для друку

зрабіць стартавай

дабавіць у выбранае