Бізнес-навіны

Судан зацікаўлены пераняць вопыт Беларусі ў жывёлагадоўлі

Фота Міністэрства сельскай гаспадаркі і харчавання

6 мая, Мінск /Кар. БЕЛТА/. Жывёлагадоўля адыгрывае ключавую ролю ў эканоміцы Судана, таму ёсць зацікаўленасць пераняць вопыт Беларусі ў гэтай сферы. Такую заяву ў час рабочай сустрэчы з міністрам сельскай гаспадаркі і харчавання Юрыем Горлавым, дзе абмяркоўваліся перспектывы двухбаковага супрацоўніцтва ў сельскай гаспадарцы, зрабіў пасол Судана ў Беларусі Амер Эламін Абдала Фадлала, паведамілі БЕЛТА ў прэс-службе сельскагаспадарчага ведамства.

Асновай для развіцця адносін стаў мемарандум аб узаемаразуменні, падпісаны ў 2016 годзе паміж міністэрствамі сельскай гаспадаркі дзвюх краін. У мінулым годзе тавараабарот паміж Беларуссю і Суданам быў прадстаўлены імпартнымі пастаўкамі гуміарабіку - цвёрдай празрыстай смалы, якая выкарыстоўваецца ў вытворчасці кляёў, кандытарскіх вырабаў і фармацэўтычных прэпаратаў.

"Наша прадукцыя прадстаўлена больш як у 100 краінах, мы займаем лідзіруючыя пазіцыі сярод сусветных экспарцёраў мясной і малочнай прадукцыі. Гатовы прапанаваць шырокі спектр рашэнняў для партнёраў", - падкрэсліў гатоўнасць Беларусі нарошчваць экспартны патэнцыял у адносінах да суданскага рынку Юрый Горлаў.

Беларусь адкрыта да ўзаемадзеяння ў частцы паставак кармоў для буйной рагатай жывёлы і птушкі, глютэну для хлебапячэння, ветэрынарных прэпаратаў і вакцын. Аграрныя ВНУ краіны гатовы дзяліцца вопытам і развіваць сумесныя адукацыйныя праграмы па падрыхтоўцы кваліфікаваных спецыялістаў у сельскай гаспадарцы.

"Судан спецыялізуецца на вырошчванні цукровага трыснягу, сорга, арахісу, проса, агародніны і фруктаў. Жывёлагадоўля адыгрывае ключавую ролю ў эканоміцы краіны, і мы зацікаўлены пераняць вопыт Беларусі ў гэтай сферы", - высока ацаніў гатоўнасць да развіцця супрацоўніцтва Амер Эламін Абдала Фадлала.

Міністр сельскай гаспадаркі і харчавання Юрый Горлаў перадаў запрашэнне ўрадавым і дзелавым колам Судана прыняць удзел у міжнароднай сельскагаспадарчай выстаўцы "Белагра-2025", якая адбудзецца ў чэрвені.

версія для друку

зрабіць стартавай

дабавіць у выбранае