Бізнес-навіны

Сістэмы накаплення электрычнасці. Якія інавацыі плануюць выкарыстоўваць у энергетыцы Беларусі

Фота з архiва

15 лістапада, Мінск /Кар. БЕЛТА/. Выкарыстанне сістэм накаплення электраэнергіі - адна з інавацый, на якую робяць стаўку ў развіцці энергетычнай галіны Беларусі. Аб гэтым у эфіры Першага інфармацыйнага тэлеканала расказаў намеснік старшыні Дзяржстандарту, дырэктар Дэпартамента па энергаэфектыўнасці Віталь Крэцкі, паведамляе БЕЛТА.

Дырэктар Дэпартамента па энергаэфектыўнасці закрануў тэму інавацый, якія ў перспектыве будуць выкарыстоўвацца ў энергетычнай сферы Беларусі, і гэта перш за ўсё электратэхналогіі. "Для сябе на бліжэйшую перспектыву мы бачым такі напрамак, як выкарыстанне сістэм накаплення электрычнай энергіі. Гэта будзе садзейнічаць у беларускай энергасістэме выраўноўванню графікаў электрычнай нагрузкі, як вынік - павышэнне эфектыўнасці выкарыстання паліва, надзейнасці электразабеспячэння нашых спажыўцоў. Сістэмы накаплення можна таксама выкарыстоўваць і ў рэальным сектары эканомікі на звычайных прадпрыемствах, якія маюць нераўнамерны аб'ём спажывання электраэнергіі на працягу сутак. З улікам развіцця электратранспарту гэты напрамак можна эфектыўна інтэграваць у электразарадную інфраструктуру для нашых электрамабіляў", - расказаў Віталь Крэцкі.

Іншыя перспектыўныя напрамкі - укараненне цеплавых помпаў і замяшчэнне імпартуемых відаў паліва, напрыклад прыроднага газу, на мясцовыя віды паліва.

Віталь Крэцкі адзначыў, што будучыня энергасістэмы Беларусі - за аўтаматызацыяй, лічбавізацыяй усіх вытворчых працэсаў, якія цяпер адбываюцца на айчынных прадпрыемствах, а таксама ўкараненнем штучнага інтэлекту. "Сёння ёсць шэраг прыкладаў, дзе непасрэдна ёсць лічбавыя двайнікі той ці іншай станцыі, і за гэтым будучыня", - упэўнены ён.

Дырэктар Дэпартамента па энергаэфектыўнасці растлумачыў, што такія двайнікі дазваляюць аўтаматычна размяркоўваць нагрузку і рэгуляваць іншыя працэсы, калі нешта выходзіць са строю. Акрамя таго, лічбавыя тэхналогіі ўкаранёны і на кацельнях, якія працуюць на мясцовых відах паліва, - там можна кіраваць загрузкай пелетаў і ўсёй кацельні ўстаноўкай з мабільнага тэлефона. Адпаведна павышаюцца і патрабаванні да такога аператара, ён павінен быць высокакваліфікаваным спецыялістам.

версія для друку

зрабіць стартавай

дабавіць у выбранае