Бізнес-навіны

Румас даручыў павысіць эфектыўнасць выкарыстання сродкаў інавацыйных фондаў

31 сакавіка, Мінск /Кар. БЕЛТА/. Прэм'ер-міністр Беларусі Сяргей Румас на пасяджэнні Прэзідыума Савета Міністраў даручыў прыняць меры, каб павысіць эфектыўнасць выкарыстання сродкаў інавацыйных фондаў, перадае карэспандэнт БЕЛТА.

"Згодна з праграмай сацыяльна-эканамічнага развіцця Беларусі на бягучую пяцігодку, галоўная мэта - паляпшэнне якасці жыцця насельніцтва на аснове росту канкурэнтаздольнасці эканомікі, прыцягнення інвестыцый і інавацыйнага развіцця. Сёння мы разгледзім пытанне аб рэалізацыі Дзяржаўнай праграмы інавацыйнага развіцця Беларусі на 2016-2020 гады і дадзім ацэнку яе вынікам за 2019 год", - сказаў Сяргей Румас.

Як адзначыў прэм'ер-міністр, у мінулым годзе забяспечаны рост паказчыкаў інавацыйнага развіцця краіны. "Гэта пацвярджаецца і Глабальным інавацыйным індэксам, дзе Беларусь па выніках 2019 года заняла 72 месца, палепшыўшы сваю пазіцыю на 14 пунктаў. Але дадатная дынаміка інавацыйнага развіцця краіны не выключае неабходнасці разгляду некаторых праблемных пытанняў", - падкрэсліў ён.

Сярод пералічаных кіраўніком урада праблем - невыкананне шэрагам заказчыкаў устаноўленых паказчыкаў, незабеспячэнне па шэрагу праектаў дзяржпраграмы ўводу ў эксплуатацыю і выхаду вытворчасцей на праектную магутнасць ва ўстаноўленыя тэрміны. Сяргей Румас адзначыў неабходнасць прааналізаваць прычыны праблем, абмеркаваць прапановы па іх папярэджанні і меры павышэння эфектыўнасці выкарыстання сродкаў інавацыйных фондаў.

"Улічваючы, што 2020-ы - гэта год распрацоўкі дзяржпраграмы інавацыйнага развіцця на наступную пяцігодку, сёння трэба зрабіць акцэнт на задачах, якія неабходна вырашыць для павышэння эфектыўнасці яе выканання", - дадаў прэм'ер-міністр.

версія для друку

зрабіць стартавай

дабавіць у выбранае