Бізнес-навіны

Рост аб'ёмаў вытворчасці і рэструктурызацыя даўгоў. Як "АМКАДОР" мае намер выходзіць са складанай сітуацыі

Фота з архiва

18 жніўня, Мінск /Кар. БЕЛТА/. Холдынг "АМКАДОР" мае намер выходзіць з цяперашняй няпростай сітуацыі, нарошчваючы аб'ёмы вытворчасці і выкарыстоўваючы прапанаваныя дзяржавай меры па рэструктурызацыі запазычанасці. Адпаведныя падыходы будуць замацаваны ў праекце ўказа кіраўніка дзяржавы, які абмяркоўваўся на нарадзе Прэзідэнта Беларусі Аляксандра Лукашэнкі з кіраўніцтвам Савета Міністраў 18 жніўня, перадае карэспандэнт БЕЛТА.

На мерапрыемстве быў канцэптуальна разгледжаны праект указа па стабілізацыі дзейнасці прадпрыемстваў холдынга "АМКАДОР". Дакумент быў у цэлым падтрыманы Прэзідэнтам і пасля аператыўнай дапрацоўкі будзе ўнесены на подпіс кіраўніку дзяржавы. Аб гэтым журналістаў па выніках нарады праінфармаваў намеснік прэм'ер-міністра Віктар Каранкевіч.

Аб праекце ўказа

Паводле яго слоў, у праекце ўказа прадугледжваецца рэструктурызацыя даўгавых абавязацельстваў "АМКАДОРа" з мэтай іх далейшага эфектыўнага выкарыстання для павелічэння аб'ёмаў вытворчасці, забеспячэння збалансаванасці фінансавых патокаў і завяршэння рэалізацыі інвестыцыйных праектаў, якія знаходзяцца ў высокай ступені гатоўнасці.

У адпаведнасці з планамі ўрада і новага кіраўніцтва холдынга аддача ад рэалізацыі інвестпраектаў чакаецца ўжо з 2026 года. Плануецца нарасціць аб'ёмы вытворчасці як камплектуючых, так і гатовай тэхнікі, пры гэтым знізіўшы затраты. "Гэта значыць павінна адбыцца значнае павелічэнне аб'ёмаў вытворчасці за кошт рэалізацыі эфектыўных імпартазамяшчальных інвестпраектаў, якія знаходзяцца ў высокай ступені гатоўнасці, даюць магчымасць вырабляць камплектуючыя і пашыраць лінейку запатрабаванай як унутры Беларусі, так і за яе межамі наменклатуры тэхнікі", - растлумачыў віцэ-прэм'ер.

Ён звярнуў увагу, што цяпер важна мабілізаваць рэсурсы прадпрыемства на выпуск той тэхнікі, якая запатрабавана, і на выкананне абавязацельстваў па ўжо заключаных кантрактах. А далей - працаваць на ўнутраным і знешніх рынках для заключэння новых кантрактаў. "Цяпер трэба выйсці на аб'ёмы вытворчасці, якія забяспечваюць стабільную, прыбытковую работу. Потым рухацца далей, паступова пашыраючы наменклатуру, павялічваючы аб'ёмы", - упэўнены Віктар Каранкевіч.

Асноўныя прыярытэты работы будуць замацаваны ў стратэгіі развіцця "АМКАДОРа", якую таксама плануецца ўключыць у праект указа.

Аб дадатковым фінансаванні

Прэзідэнт на нарадзе ставіў задачу выпрацаваць комплекснае рашэнне па фінансавым аздараўленні холдынга, каб потым зноў не ўзніклі просьбы аб падтрымцы з боку дзяржавы. "Я ўжо не раз адзначаў: ад практыкі "падтрымання штаноў" трэба пазбаўляцца. Бюджэтныя грошы - грошы народныя. І ў нас ёсць шмат куды ўкладваць гэтыя грошы", - падкрэсліў Прэзідэнт.

Таму журналісты ўдакладнілі ў Віктара Каранкевіча, ці будуць дадатковыя фінансавыя ўліванні з боку дзяржавы. "У рамках рэструктурызацыі даўгавых абавязацельстваў прадугледжваюцца розныя магчымыя механізмы. У тым ліку шляхам прадастаўлення рэсурсаў на далейшую рэструктурызацыю даўгоў", - растлумачыў ён.

"У цэлым усе рэсурсы (запазычаныя ў дзяржавы. - Заўвага БЕЛТА) павінны быць вернуты, але ў вызначаным перыядзе (часу. - Заўвага БЕЛТА) і з выкарыстаннем адпаведнага механізма, - падкрэсліў віцэ-прэм'ер. - Гэта значыць вызначаныя сумы (у працэнтных суадносінах ад выручкі) павінны будуць накіроўвацца на пагашэнне абавязацельстваў. Гэта дасць магчымасць стабілізаваць фінансавы стан прадпрыемства, збалансаваць фінансавыя патокі".

Аб росце вытворчасці і захаванні калектыву

Адно з патрабаванняў кіраўніка дзяржавы ў адносінах да холдынга датычылася захавання працоўнага калектыву. У сувязі з гэтым журналісты пацікавіліся пасля нарады ў генеральнага дырэктара "АМКАДОРа" Аляксандра Яфімава, ці не будзе скарачэння супрацоўнікаў або зніжэння зарплат. "Перажываць у гэтай частцы няма неабходнасці, таму што холдынг "АМКАДОР" нацэлены на павелічэнне аб'ёмаў вытворчасці - да 2030 года не менш як у два разы ў адносінах да бягучага года", - сказаў ён.

Кіраўнік падкрэсліў, што будзе прадоўжаны курс на пашырэнне наменклатуры выпускаемай прадукцыі з максімальнай лакалізацыяй вытворчасці. Такія задачы перад прадпрыемствам ставіць і Прэзідэнт.

Наяўнасць уласнай кампанентнай базы, якую холдынг актыўна развівае, дала магчымасць стабільна функцыянаваць у няпросты час пасля ўвядзення пэўных абмежаванняў. "Курс у гэтай частцы будзе прадоўжаны на пашырэнне лінейкі (але пры гэтым найбольш маржынальных відаў прадукцыі) і лакалізацыю на нашым прадпрыемстве, якое выпускае кампанентную базу", - растлумачыў Аляксандр Яфімаў.

Акрамя таго, плануецца завяршыць 10 інвестпраектаў, у тым ліку інтэграцыйныя імпартазамяшчальныя праекты з расійскім бокам.

"Настрой у калектыву аптымістычны. Усе настроены на работу і высокі вынік у рамках тых даручэнняў, якія ставіць перад нашымі прадпрыемствамі кіраўнік дзяржавы", - запэўніў гендырэктар.

У частцы выпуску новай прадукцыі ён удакладніў, што гэта ні ў якім выпадку не супярэчыць асноўным патрабаванням Прэзідэнта. На нарадзе Аляксандр Лукашэнка выказаў меркаванне, што магчымай прычынай няпростай сітуацыі на "АМКАДОРы" стала пагоня за разнастайнасцю. І цяпер трэба сканцэнтраваць намаганні і рэсурсы на вытворчасці самых запатрабаваных і, адпаведна, буйнасерыйных мадэлей тэхнікі.

Аляксандр Яфімаў запэўніў, што менавіта такога падыходу будуць прытрымлівацца ў холдынгу - будуць ацэньваць маржынальнасць прадукцыі і ўлічваць максімальную даходнасць пры праектаванні, пастаноўцы ў вытворчасць. "Мы сканцэнтруемся на самых эканамічна эфектыўных навуковых тэмах у частцы пашырэння наменклатуры", - сказаў ён.

"У сучасным свеце без росту наменклатуры, на жаль, утрымлівацца складана, - дадаў гендырэктар. - Без гэтага руху наперад не будзе развіцця прадпрыемства. Пры гэтым усё будзе кропкава, выверана".

Аб канкурэнцыі

Кіраўнік звярнуў увагу, што развівацца прадпрыемствам холдынга даводзіцца ва ўмовах жорсткай канкурэнцыі на ўсіх рынках збыту. Перавага тут у тых, хто забяспечыць аптымальныя суадносіны сабекошту і якасці прадукцыі. "У гэтай частцы мы праводзім вялікую работу па аптымізацыі затрат з мэтай зніжэння цаны нашых вырабаў для канечных спажыўцоў. І набліжаемся па тэхнічных патрабаваннях нашых машын да сусветнага ўзроўню. У сукупнасці два гэтыя фактары прывядуць да таго, што мы не проста захаваемся, а паступова будзем павялічваць нашу долю прысутнасці ў першую чаргу на традыцыйным для нас экспартным рынку Расійскай Федэрацыі", - сказаў ён.

Пагрузчык вытворчасці "АМКАДОР", напрыклад, у два разы таннейшы за заходнія аналагі, але крыху даражэйшы, чым у азіяцкіх вытворцаў. Але з пункту гледжання дзяржавы пераваг у айчыннай прадукцыі значна больш. Тут і захаванне ў краіне валавой дабаўленай вартасці, і падаткі, якія выплачваюцца краіне, і рабочыя месцы, і тэхналогіі, і стымуляванне да развіцця сумежных галін, і гэтак далей.

Каб забяспечыць канкурэнтныя перавагі айчынным вытворцам, дзяржава прымае пэўныя меры. У Саюзнай дзяржаве, напрыклад, такія меры падтрымкі таксама прадугледжаны. "Толькі такі падыход дасць магчымасць вытрымаць канкурэнцыю. Кітайцы выпускаюць каля 200 тыс. адзінак пагрузчыкаў у год. Мы можам вырабіць каля 2 тыс. адзінак. Вытрымаць у чыстым выглядзе гэту канкурэнцыю наўрад ці здольна хоць адна краіна ў свеце, ёсць эфект маштабу. Але мы разумеем, што за намі - тэхналагічны суверэнітэт. Падтрымка і развіццё сваіх вытворчасцей - гэта ключавы фактар, які будзе садзейнічаць пашырэнню нашай прысутнасці на ўнутраным рынку", - падкрэсліў Аляксандр Яфімаў.

версія для друку

зрабіць стартавай

дабавіць у выбранае