Бізнес-навіны

Рагожнік расказаў аб дамоўленасцях Беларусі і Расіі па газу

Фота з архiва

6 студзеня, Мінск /Кар. БЕЛТА/. Надзвычайны і Паўнамоцны Пасол Беларусі ў Расіі Аляксандр Рагожнік расказаў аб дамоўленасцях Беларусі і Расіі па газу ў інтэрв'ю тэлеканалу "Беларусь 1", паведамляе БЕЛТА.

У цэнтры ўвагі застаецца пытанне аб цэнах на газ. У канцы 2025 года адбылася рабочая сустрэча намесніка прэм'ер-міністра Беларусі Віктара Каранкевіча і гендырэктара ААТ "Газпрам трансгаз Беларусь" Уладзіміра Маёрава з кіраўніком ПАТ "Газпрам" Аляксеем Мілерам.

"Былі дасягнуты дамоўленасці. Магу сказаць адно, што яны не горшыя, чым тыя ўмовы, якія функцыянавалі да 2026 года. Таму нейкага рэзкага росту тарыфаў, зразумела, не чакаецца. Мы дамовіліся аб тым, што суб'екты гаспадарання будуць працаваць у дастаткова камфортных для сябе ўмовах", - падкрэсліў Аляксандр Рагожнік.

У 2025 годзе прайшла выстаўка "ІНАПРАМ. Беларусь". "Цікавасць была вялікай. Пытанне паўторнага правядзення абмяркоўвалася з першым намеснікам старшыні ўрада Расіі Дзянісам Мантуравым на мінулым тыдні. Ён падтрымаў ідэю, каб выстаўка "ІНАПРАМ. Беларусь" стала штогадовай, таму што расійскія вытворцы вельмі высока ацанілі нашу пляцоўку. Гэта было па-сапраўднаму свята для ўсіх, на якім заключылі вялікую колькасць двухбаковых кантрактаў. І галоўнае - гэта дало магчымасць больш адзін пра аднаго даведацца ў адным месцы. Больш таго, мы пайшлі крыху далей і дасягнулі дамоўленасці з Мінпрамгандлем аб тым, каб у чэрвені на пляцоўцы нашай аграрнай выстаўкі "Белагра" арганізаваць гандлёва-закупачную сесію з усім рытэйлам Расіі, з самымі буйнымі сеткамі, якія працуюць у галіне рэалізацыі прадуктаў харчавання і тавараў лёгкай прамысловасці, а сёння яны фарміруюць фактычна 95 працэнтаў  продажаў. Наша цікавасць не толькі ў тым, каб больш прадаць, але і ў тым, каб атрымаць высокую даходнасць. Сёння работа ў вельмі добрай дынаміцы вядзецца з усімі сеткамі", - падзяліўся планамі пасол.

Таксама Аляксандр Рагожнік расказаў аб тым, ці ёсць праблемы з доступам беларускай прадукцыі ў гандлёвыя сеткі Расіі. "Вядома, уваход у сеткі - шлях няпросты. Ён няпросты ў тым, што ў кожнай сеткі свае патрабаванні да ўпакоўкі, рытмічнасці паставак. Сеткі зацікаўлены ў тым, каб беларуская прадукцыя прысутнічала ў значным асартыменце, таму што, зыходзячы з высокага попыту на яе, гэта прыносіць даход. Пачалі адкрыццё "Беларускіх вёсак" (размова пра мультыбрэндавую гандлёвую прастору "Беларуская вёска". - Заўвага БЕЛТА) у буйных гандлёвых сетках. Такія сеткі з'явіліся ў Маскве, у Санкт-Пецярбургу, і сёння ўжо гаворым аб тым, каб у гарадах-мільённіках з'явіліся такія пляцоўкі. Гэта не толькі рэалізацыя, але і рэклама ў адным месцы вялікага спектра нашай прадукцыі: ад прадуктаў харчавання да тавараў лёгкай прамысловасці", - адзначыў ён.

Акрамя таго, пасол расказаў, на якой стадыі знаходзіцца рэалізацыя праекта па пытанні будаўніцтва высакаскораснай чыгуначнай магістралі Масква - Мінск. "Гэта высокатэхналагічны праект. Распрацоўваецца ён у першую чаргу паміж Масквой і Санкт-Пецярбургам. Праект сам па сабе вельмі няпросты. Таму сёння абмяркоўваецца тэхнічная і фінансавая частка для таго, каб ён, як любы праект, быў акупны і цікавы людзям. З расійскімі чыгункамі ў нас склаліся вельмі добрыя адносіны. 15 снежня была запушчана "Ластаўка" ўжо ў 10-вагонным выкананні. Сёння гэта вельмі камфортныя тарыфы для пераезду паміж дзвюма сталіцамі", - праінфармаваў ён.

Пасол чакае, што 2026 год для Беларусі і Расіі будзе чарговым рэкордным годам у двухбаковых адносінах. "Бліжэй двух народаў, напэўна, няма. Мінулыя гады паказалі, што неабходна абапірацца на таго, хто табе блізкі не толькі ў галіне двухбаковых адносін, тавараабароту, а проста нават ментальна, на ўзроўні агульначалавечым, гістарычным", - падагульніў Аляксандр Рагожнік.

версія для друку

зрабіць стартавай

дабавіць у выбранае