Бізнес-навіны

Прэм'ер-міністр Літвы: мы звернемся да Мінска з просьбай, каб вярнуць грузавікі, якія стаяць на граніцы

Фота з архiва

5 лістапада, Мінск /Кар. БЕЛТА/. Прэм'ер-міністр Літвы Інга Ругінене пасля сённяшняга пасяджэння ўрада заявіла, што Вільнюс звернецца да Мінска з просьбай дазволіць грузавікам вярнуцца ў краіну. Аб гэтым пішуць літоўскія СМІ.

Пасля таго як у Беларусі затрымаліся каля 5 тыс. літоўскіх грузавікоў і паўпрычэпаў, перавозчыкі краіны запатрабавалі ад урада Літвы прыняць тэрміновыя меры ў сувязі з крытычнай сітуацыяй, што склалася пасля закрыцця пагранічных пераходаў з Беларуссю. Літоўская нацыянальная асацыяцыя аўтамабільных перавозчыкаў (LINAVA) накіравала прэм'еру пісьмо з такімі патрабаваннямі. Адзначалася, што наступствы ад закрыцця граніцы могуць закрануць 35 тыс. чалавек і ўзмацніць сацыяльную напружанасць у галіне. У пісьме да прэм'ера змешчана патрабаванне даць адказ не пазней за 5 лістапада 2025 года.

"Ніякага ўльтыматуму з боку перавозчыкаў я не чула - прынамсі, ён відавочна не быў агучаны. Але ўчора ў Міністэрстве ўнутраных спраў адбылася сустрэча з транспартнымі арганізацыямі, і сёння вырашана звярнуцца да Беларусі, каб дамовіцца аб вяртанні літоўскіх грузавікоў дадому", - сказала Ругінене журналістам.

"Працэс ужо ідзе, перагаворы вядуцца, паглядзім, які будзе вынік", - таксама паведаміла яна, дадаўшы, што "сама граніца застанецца закрытай".

Міністр унутраных спраў Літвы Уладзіслаў Кандратовіч сказаў, што рашэнне ўрада закрыць граніцу на месяц не будзе перагледжана, хоць разглядаюцца дадатковыя магчымасці для тых, на каго ўжо распаўсюджваюцца выключэнні.

Раней у LINAVA не выключылі папераджальных пратэстаў, калі ўрад Літвы не выправіць сітуацыю на граніцы з Беларуссю. Прадстаўнікі асацыяцыі 2 лістапада правялі ўнутраную сустрэчу, на якой абмяркоўвалася сітуацыя, што склалася. Віцэ-прэзідэнт LINAVA Алег Тарасаў заяўляў таксама, што адзіны спосаб вырашыць праблему - адкрыць граніцу з Беларуссю.

На мінулым тыдні Літва прыняла рашэнне закрыць на месяц два астатнія пункты пропуску на граніцы з Беларуссю. Рух праз пункт пропуску "Шальчынінкай" поўнасцю прыпынены. Дзейнасць пункта пропуску "Мядзінінкай" абмежавана выключэннямі. Там перасякаць граніцу змогуць толькі дыпламаты, асобы са спрошчаным транзітным дакументам, грамадзяне Літвы і іх сем'і, якія вяртаюцца на радзіму, грамадзяне краін ЕС з членамі сем'яў, іншаземцы, якія маюць пасведчанне на права жыхарства ў Літве або гуманітарную візу.

версія для друку

зрабіць стартавай

дабавіць у выбранае