Бізнес-навіны

Прамысловасць, адукацыя, турызм. Якія перспектыўныя сферы супрацоўніцтва Беларусі і Узбекістана

3 верасня, Віцебск /Кар. БЕЛТА/. Прамысловая кааперацыя, супрацоўніцтва ў сферы адукацыі, культуры, турызму - такія перспектыўныя напрамкі супрацоўніцтва Узбекістана і Беларусі. Аб гэтым на пленарным пасяджэнні на III Беларуска-ўзбекскім жаночым бізнес-форуме, які праходзіць у Віцебску, расказала старшыня Сената Олій Мажліса Рэспублікі Узбекістан Танзіла Нарбаева, перадае карэспандэнт БЕЛТА.

Паводле яе слоў, нягледзячы на турбулентныя геапалітычныя падзеі ў свеце, абедзве краіны дэманструюць стабільны рост эканомікі, актыўна развіваюць прамысловы, інавацыйны, аграрны сектары, што стварае спрыяльныя ўмовы для ўмацавання гандлёва-эканамічнага супрацоўніцтва. Яна адзначыла, што двухбаковы тавараабарот развіваецца ў дадатнай дынаміцы. Урады дзвюх краін інтэнсіўна працуюць над узмацненнем супрацоўніцтва. "Мы прыкладзём усе намаганні па стварэнні надзейнай прававой базы, якая дасць магчымасць паспяхова рэалізоўваць дасягнутыя на вышэйшым узроўні дамоўленасці. Мы зацікаўлены і далей паслядоўна працаваць над нарошчваннем маштабаў супрацоўніцтва, удзяляючы ўвагу рэалізацыі праектаў у ключавых галінах", - падкрэсліла старшыня Сената Олій Мажліса Узбекістана.

Актыўна развіваюцца кантакты ў тэкстыльнай, фармацэўтычнай, электратэхнічнай, сельскагаспадарчай сферах. Наладжана сумесная вытворчасць кабельна-правадніковай прадукцыі ў Ташкенцкай вобласці, абутку, гатовай тэкстыльнай прадукцыі пад вядомымі беларускімі брэндамі, рэалізуюцца праекты па арганізацыі ва Узбекістане зборкі трактароў. Танзіла Нарбаева падкрэсліла, што ў рэспублікі ёсць усе магчымасці для стварэння новых сумесных прадпрыемстваў у сферы швейнай, трыкатажнай вытворчасці, выпуску ўпаковачных матэрыялаў для харчпрама.

Насельніцтва Узбекістана складае 38 млн, штогод нараджаецца каля 1 млн дзяцей, і гэта галоўнае багацце краіны. "Кожны год па 500-600 тыс. маладых людзей уступаюць у працоўнае жыццё, і неабходна забяспечваць іх рабочымі месцамі. У гэтым плане супрацоўніцтва з беларускім бокам - гэта правільны напрамак", - адзначыла Танзіла Нарбаева.

Набірае абароты і міжрэгіянальнае дзелавое партнёрства. З 2017 года паміж рэгіёнамі Узбекістана і Беларусі адбылося больш за 40 узаемных візітаў, уключаючы ўдзел у форумах. Так, па выніках другога Форуму рэгіёнаў Узбекістана і Беларусі, які адбыўся ў лютым 2024 года ў Ташкенце, былі падпісаны кантракты і пагадненні на суму большую за $1 млрд. На тэрыторыі Узбекістана цяпер функцыянуюць 240 прадпрыемстваў з удзелам беларускага капіталу.

Танзіла Нарбаева звярнула ўвагу, што паміж Беларуссю і Узбекістанам для павелічэння патоку турыстаў важна наладзіць транспартныя зносіны, прычым не толькі паміж сталіцамі дзяржаў, але і іншымі гарадамі - старажытнымі, прыгожымі і багатымі на славутасці. Менавіта таму на гэтым форуме асаблівую ўвагу ўдзялілі развіццю турыстычнага патэнцыялу і супрацоўніцтву ў названай галіне.

"Хацела б спыніцца на такім не менш важным напрамку, як актыўнае нарошчванне супрацоўніцтва ў культурна-гуманітарнай сферы, якая адыгрывае асаблівую ролю ва ўмацаванні даверу, узаемаразумення, збліжэння нашых народаў. Паслядоўныя намаганні нашых краін па паляпшэнні сацыяльнай сферы, умацаванні сістэмы адукацыі, ахове здароўя, культуры садзейнічаюць павышэнню якасці жыцця насельніцтва і фарміраванню трывалай асновы для доўгатэрміновага развіцця", - адзначыла старшыня Сената Олій Мажліса.

Беларусь і Узбекістан цесна супрацоўнічаюць і ў навуковай сферы - праводзяцца сумесныя конкурсы навуковых, інавацыйных праектаў у галіне тэхналогій, сельскай гаспадаркі і медыцыны. "Сумесна рэалізаваны 54 навуковыя праекты агульным коштам каля $4 млн. У супрацоўніцтве з беларускімі вучонымі прадаўжаецца работа над 30 праектамі на суму $3 млн", - расказала Танзіла Нарбаева.

Абедзве краіны рэалізуюць сумесныя адукацыйныя праграмы. У Беларусі вучацца больш за 1,2 тыс. узбекскіх студэнтаў і 1,1 тыс. - у філіялах беларускіх ВНУ на сваёй радзіме. Абменьваюцца перадавым вопытам і прадстаўнікі ўстаноў аховы здароўя. Такая практыка дапамагае павысіць якасць медыцынскіх паслуг, укараняць інавацыйныя тэхналогіі і весці падрыхтоўку высокакваліфікаваных спецыялістаў. Вялікая ўвага ўдзяляецца ахове мацярынства і дзяцінства, і ў гэтым напрамку вопыт беларусаў вельмі карысны для Узбекістана.

"У культурным абмене асаблівае значэнне маюць міжнародныя фестывалі, як "Усходнія мелодыі" ва Узбекістане і "Залатая пчолка" і "Славянскі базар у Віцебску" ў Беларусі. Яны становяцца сапраўднымі мастамі дружбы паміж народамі", - сказала Танзіла Нарбаева, дадаўшы, што неабходна ўзмацніць культурна-гуманітарнае супрацоўніцтва дзвюх краін.

Гаворачы пра сёлетні жаночы бізнес-форум у Віцебску, старшыня Сената Олій Мажліса Узбекістана адзначыла, што яго ўдзельнікамі сталі больш за 200 паспяховых прадпрымальнікаў з дзвюх краін, уключаючы 60 бізнес-лэдзі Узбекістана. Танзіла Нарбаева таксама падкрэсліла, што ўдзел мужчын у жаночым бізнес-форуме раўнацэнна важны. "Тут актыўны ўдзел павінны прымаць абсалютна ўсе прадпрымальнікі, якім цікава ствараць новыя рабочыя месцы", - выказала яна сваё меркаванне.

версія для друку

зрабіць стартавай

дабавіць у выбранае