Бізнес-навіны

Прамкааперацыя, будаўніцтва, турызм. Чабатар аб прыярытэтах супрацоўніцтва з Уладзімірскай вобласцю

Фота з архiва

17 верасня, Нясвіж /Кар. БЕЛТА/. Беларусь зацікаўлена ва ўмацаванні партнёрскіх сувязей з Уладзімірскай вобласцю. У ліку прыярытэтных напрамкаў - прамкааперацыя, будаўніцтва, турызм. Аб гэтым на пасяджэнні рабочай групы па супрацоўніцтве Рэспублікі Беларусь і Уладзімірскай вобласці Расійскай Федэрацыі заявіў міністр эканомікі, кіраўнік беларускай часткі рабочай групы Юрый Чабатар, перадае карэспандэнт БЕЛТА.

Юрый Чабатар адзначыў, што прыярытэт нумар адзін - прамысловая кааперацыя. Беларусь бачыць вялікія рэзервы ў машынабудаванні, металургіі, хімічнай прамысловасці.

Яшчэ адна ключавая галіна - сельская гаспадарка. Беларусь гатова максімальна задавальняць патрэбнасці ў якасных прадуктах харчавання. Таксама развіваецца супрацоўніцтва ў будаўніцтве: беларускія будаўнікі ўдзельнічаюць у стварэнні важных для рэгіёна аб'ектаў. Асаблівае месца ва ўзаемадзеянні займае і сфера ЖКГ.

Па выніках студзеня-ліпеня тавараабарот на 4 працэнты перасягнуў узровень мінулага года, і ў рэспубліцы зацікаўлены ў павелічэнні ўзаемных паставак.

"Падтрымліваем кантакты на пастаяннай аснове. Бачым, што тавараабарот расце, але патэнцыял значна большы. Трэба шукаць рэзервы", - адзначыў Юрый Чабатар.

Акрамя таго, ён зрабіў акцэнт на сумесных інвестпраектах у турызме. У Беларусі стаіць задача павялічыць уклад турыстычнай індустрыі ў ВУП у 2 разы за пяць гадоў. "Нам будзе карысна абмяняцца вопытам у гэтай сферы", - адзначыў Юрый Чабатар.

Асобна міністр спыніўся на пагадненні аб устанаўленні дружалюбных адносін паміж Нясвіжам і Суздалем. Гэты дакумент мае патэнцыял стаць трамплінам для правядзення сумесных фестываляў, стварэння механізмаў для развіцця інфраструктуры гасціннасці і адпачынку.

"Мы адкрыты і да іншых ініцыятыў - усе ідэі, якія могуць пашырыць наша супрацоўніцтва, заслугоўваюць увагі, падтрымкі", - адзначыў Юрый Чабатар.

Дэлегацыя Уладзімірскай вобласці на чале з губернатарам Аляксандрам Аўдзеевым наведвае Беларусь 17-19 верасня. На пасяджэнні прадметна разгледжаны рэзервы пашырэння гандлёва-эканамічнага супрацоўніцтва, стварэнне новых кааперацыйных сувязей у прамысловасці, АПК, будаўніцтве, існуючы патэнцыял у сферы турызму.

Кіраўнік расійскай часткі рабочай групы Аляксандр Аўдзееў падзякаваў за цёплы прыём і павіншаваў беларусаў з Днём народнага адзінства, пажадаў краіне працвітання і мірнага неба. "Наша супрацоўніцтва развіваецца нягледзячы на санкцыйны націск. Мы цэнім тое, што вырабляецца ў рэспубліцы. Плануем і далей узаемадзейнічаць. Асобная ўдзячнасць - беларускім будаўнікам, якія выконваюць работы якасна, у тэрмін. Плануем новыя праекты. Разглядаем магчымасць пашырыць супрацоўніцтва і ў сельскай гаспадарцы. Турызм таксама лічым адным з прыярытэтаў. Яго роля павінна ўзрасці. Гэта малы і сярэдні бізнес, культура гасціннасці. Можам быць карысныя адзін аднаму", - адзначыў Аляксандр Аўдзееў.

версія для друку

зрабіць стартавай

дабавіць у выбранае